- Er dei usikre slepp dei køyre her

Fleire store steinar rasa måndag morgon ut på fylkesveg 633 ut til Honningsvåg på Stad. For berre tre veker sidan var ein posttilsett nær ved å bli skadd då ein stein kom gjennom taket på bilen.

Dei som brukar vegen fryktar det skal kome fleire ras, noko også postsjefen i området er uroa for.

- Dette er eit område der det går ras både sommar og vinter, gong på gong. Vi har sagt at dersom våre tilsette føler seg usikre, så skal dei sleppe å køyre her, då får dei heller snu, seier distribusjonsleiar for posten i Selje, Vågsøy og på Bremangerlandet, Edvard Iversen.

• LES OGSÅ: - Her kan det kome til å gå liv

Fryktar for tryggleiken til sine tilsette

I morgontimane måndag gjekk det for andre gong på kort tid eit ras ved Kleiva på fylkesveg 633. Asbjørg Honningsvåg som arbeider i Posten var på veg til arbeid då ho vart møtt av fleire store steinar i vegen. Ho prisar seg lukkeleg for at ho fekk steinane over vegen.

- Vi kan ikkje stole på flaksen lenger. Eg er redd det kan kome til å gå gale her dersom det ikkje vert gjort noko, seier Honningsvåg til NRK.no.

Raset gjekk i eit område der det ifølgje lokalbefolkninga stadig går ras. Eit kvinneleg postbod var i slutten av juli nær ved å bli alvorleg skadd då ein stein losna i fjellsida.

- Steinen brasa rett gjennom taket på postbilen. Den gjorde ein runddans bak i lasterommet og hamna i veggen bak nakkestøtta på førarsida. Det var kanskje berre 20 centimeter frå at det gjekk skikkeleg gale, seier Iversen i Posten.

• LES OGSÅ: Ein av fem lever med rasfare
• LES OGSÅ: Krev 40 milliardar til rassikring

(Artikkelen held fram under biletet)

- Nokon må ta ansvar

Han har stor forståing for at dei tilsette gruar seg for å køyre ruta ut til Honningsvåg. Liknande situasjonar er det også på fleire andre småvegar i Selje, Vågsøy og på Bremangerlandet.

- For oss kjem tryggleiken først. Dersom våre tilsette kjenner seg usikre på å reise inn i dette området, så får dei sleppe. Det har eg vore heilt klar på, seier Iversen.

Rasområdet ligg mellom to rasoverbygg på strekninga. Iversen støttar dei som brukar vegen i kravet om at området må bli sikra.

- Både kommunen og dei som løyver midlar til vegbygging må ta ansvar.

Vil undersøke rasområdet på ny

Ein geolog frå Statens vegvesen undersøkte fjellsida i Kleiva med helikopter etter det første raset i juli. Dei vart overraska då dei måndag fekk meldingar om eit nytt ras. Dei har no bestemt seg for å undersøke området på nytt.

- Vi har bestemt oss for at vi skal ha ein geolog opp i helikopter for å vurdere området på ny, seier prosjektleiar Lars Karlsen i Statens vegvesen.

Stengjer vegen i natt

Men grunna dårleg flyvêr måndag kan undersøkingane med helikopter ikkje bli gjort før tysdag morgon.

Rasområdet ved Kleiva er under oppsikt, og Vegvesenet har måndag ettermiddag bestemt seg for å nattestenge vegen. Vegen vil halde ope på dagtid, då med vakt som held området under oppsikt, opplyser Karlsen.