Foreldre ved Dalen skule i Naustdal meiner kommunen bryt lova ved å ikkje opne symjebassenget.
Foreldre fortel om elevar som kjenner seg einsame og utanfor fordi dei ikkje kan å symje.
Fryktar asosiale born
- Dei kan bli asosiale. Det styrkar ikkje sjølvbiletet akkurat. Det er naturleg at dei trekkjer seg tilbake og ikkje blir ein del av resten av miljøet, seier Cecilie Heggelund i arbeidsutvalet ved Dalen skule i Naustdal.
Foreldra har no kome med forslag om at elevane bør bli sende til Førde på undervisning og at kommunen betaler.
For dyrt å fylle opp
I haust deltok kommunen i jippoen til regjeringa der kommunar med dårleg råd kunne ta opp rentefrie lån hjå staten for å fylle opp bassenga.
Men no seier rådmann Anna Elisa Tryti at kommunen ikkje kan fylle bassenget fordi Naustdal har Robekstatus med strenge innsparingskrav.
- Naustdal har ikkje hatt høve til å gjere noko anna enn å starte planlegginga, seier ho.
Formannskapet har samrøystes gått inn for å betale for undervisninga i Førde for dei elevane som ikkje kan å symje.
- Eg synest befolkninga i Naustdal har vore tolmodige. Vi hadde håpa å ha opplæring i Florø eller Førde, men det har vi ikkje hatt råd til, seier Tryti.
Får undervisning i Førde
Rådmannen vil ikkje seie noko om kor tid det vert vatn i bassenget. Men fram til det skjer, vil foreldra at borna får undervisning i Førde.
- Dette er noko som skal liggje inne i timeplanen på skulen, seier Cecilie Heggelund.