NRK Meny
Normal

- Det er krevjande, men også ein fordel

BERGEN (NRK): Alt ligg til rette for at fleire toppidrettsutøvarar kan kombinere idrett og studiar i fylket. Mathias Loftesnes nyttar kvar ledige augneblink til å lese til eksamen.

Mathias Loftesnes leser til eksamen mellom slaga

AVKOPLING: Mathias Loftesnes studerer matematikk mellom slaga på volleyballbana. Han er mellom fleire utøvarar som kan vere aktuelle for tilbodet 'Toppidrettsstudent' ved Høgskulen i Sogn og Fjordane.

Foto: Rune Fossum / NRK

– Eg har vore ute og spelt profesjonelt, og då har alt dreidd seg om volleyball. No kjenner eg det er godt å få avkopling med skule, seier Mathias Loftesnes.

Han sit bøygd over skulebøkene på eit hotellrom i Bergen. Midt mellom dei avgjerande kampane for Norge i EM-kvalifiseringa i volleyball må Loftesnes ha fokus på eksamen.

26-åringen er ein av fleire idrettsutøvarar som siktar seg inn på det nye tilbodet «Toppidrettsstudent» ved Høgskulen i Sogn og Fjordane til hausten.

Kan leggje til rette for hardtsatsande idrettsfolk

Eit samarbeid med Olympiatoppen gjer det mogleg å kombinere studiar og toppidrett frå hausten. Utøvarar som kjem inn som studentar, og fyller krava til toppidrettsstatus, kan få større fleksibilitet medan dei studerer ved høgskulen.

– Dei kan få lagt til rette for eksamen i utlandet, dersom dei til dømes er på landslagsopphald. Vi kan også leggje til rette for eksamen på andre høgskular i Norge, at dei kan ha seinare eksamen – eller få andre arbeidskrav, forklarer Kirsti Møller Bruland.

Ho er toppidrettskontakt ved Høgskulen i Sogn og Fjordane, og meiner det nye tilbodet er av stor verdi for utøvarane.

– Det er viktig å drive med noko anna enn berre idrett. Dessutan veit du aldri når karrieren er over, og då er det viktig å ha noko å falle tilbake på. I tillegg er det gull verdt å ha ein annan omgangskrins, seier ho.

Norsk tremannsblokk mot Israel

EM-KVALIK: Mathias Loftesnes (til høgre i blokka) spelte EM-kvalifisering med Norge. Her frå kampen mot Israel i Sotra Arena.

Foto: Rune Fossum / NRK

– Blir sliten om du berre skal tenkje på kamp

Loftesnes legg ikkje skjul på at det er krevjande å kombinere studiar og idrett på landslagsnivå. Ikkje minst når han må konsentrere seg om avgjerande EM-kampar og eksamen på éin og same gong.

Då landslaget var på treningssamling i Italia, sat sogningen ofte åleine på rommet og las matematikk. Det gjorde han også på 17. mai.

– Det er press frå fleire kantar, og eg må prestere på eksamen og i kampar. Så det er ikkje enkelt, men det er jo slik eg vil ha det, seier han.

– Kan det vere ein fordel også?

– Ja. Det er utruleg godt å kople av. Du blir veldig sliten om du skal tenkje på kamp heile dagen. Så eg synest det er veldig greitt å få lest litt kampane.

Detaljane skal finpussast
Huset til filosofen Wittgenstein flyttar.
Vestlandsbønder må hente enorme mengder naudfôr frå Austlandet og Sverige. Dette fordi begge grasavlingane på Vestlandet var langt under normalen i sommar.