- Bittert og surt som berre det

– Det er jo bittert og surt som berre det.

Slik oppsummerer assistenttrenar Håvard Flo å tape mot Lillestrøm i det aller siste ordinære speleminuttet. Sogndølene fekk sitt fjerde tap på rad, søndag kveld.

• Les heile referatet av kampen her.

– I fyrste omgang hadde vi god struktur og god balanse, og var eigentleg ikkje særleg truga. I andre omgang er vi for lite flinke til å halde på ballen. Vi mister den for ofte, og då blir det mykje springing som tærar på kreftene.

Fornøgd med eigen innsats

– Eg synes forsvaret vårt er fantastisk bra, og midtbana gjer ein kjempejobb. Men det er ikkje alltid at det lengste strået går i vår favør.

– Mista spelarane dine litt piffen i andre omgang?

– Nei, synes eg ikkje. Vi står på og jobbar gjennom heile kampen.

– Laget har vore prega av sjukdom. Mellom anna spelte ikkje Ørjan Hopen og Hannu Patronen. Korleis påverka det kampen?

– Det har ingenting med utfallet av kampen å gjere, seier Håvard Flo.

Har moglegheit til å klatre

Også hovudtrenar Jonas Olsson er vonbroten etter tapet.

– Du kan jo tenkje deg sjølv når vi gjer ein veldig bra kamp der spelarane springer veldig mykje og vi forsvarar oss bra. Då er det bittert å tape på at ballen endrar retning. Då hadde det vore betre om nokon smelte den rett i krysset.

– Vi henger med i alle kampane, og det skal vi ta med oss vidare. Det er jo ein veldig tett serie frå 11. – 12. plass og heilt opp til 3. – 4. plass. Vi har gode høve til å klatre opp.

– Kva saknar du?

– I dag saknar eg tre poeng, humrar Sogndal-trenaren.

Optimisme

Sogndalspelar Ørjan Hopen var altså ikkje med til Åråsen på grunn av sjukdom. Men han er optimistisk. Rett etter at kampen var over skreiv han på nettsamfunnet Twitter:

Ein annan ivrig Sogndal-supporter diskuterte også på Twitter. Oddvar Flæte er tidlegare fylkesmann i Sogn og Fjordane, no jobbar han mellom anna som rådgjevar for Sogndal Fotball.

Også assistenttrenar Håvard Flo er oppteken av å sjå framover.

– No må vi riste av oss denne kampen så fort som mogleg. Vi må vere offensive i kampen mot Sandnes-Ulf.

Tek i mot gode tips

– Når ein ikkje har henta poeng på ei stund, så seier det seg sjølv at det blir viktig med ein siger.

– Korleis skal ein hente seg opp att etter eit slikt tap?

– Då må ein få restitusjon, søvn og kvile for å få kroppane i modus att. Viss du har andre gode tips, så tek eg gjerne i mot det, avsluttar Håvard Flo.