NRK Meny
Normal

Wimme ja Ailu Valle BeskánLuossaRockii

Guokte vuosttaš ártistta dán jagi BeskánLuossaRocka prográmmas almmuhuvvojedje otne.

Ailu Valle & Trio boogiemen

Ailu Valle lea ártista gii geasuha erenoamážit nuoraid, muhto soitet rávváset olbmot maid liikot su musihkkii.

Foto: Wenche Marie Hætta / NRK

BeskánLuossaRock lágiduvvo goalmmát geardde suoidnemánu 2. beaivve Bieskkenjárgga gilážis, guokte miilla máttabeale Kárášjoga márkana.

Luossa ja rock lea festivála sisdoallu, gos beaivet leat bearašdoalut; luossagilvu rávisolbmuide ja oaggungilvu mánáide.

Eahkedis lea gis musihkka guovddážis. Guokte vuosttaš ártistta leaba jo soahpan, ahte boahtiba Bieskkenjárgii.

Wimme Saari

Wimme Saari lea dovddus ártista ja dán gease son guoimmuha BeskánLuossaRockas.

Foto: Maarit Kytöharju / Pressebilde

Wimme lea leamaš jo dovddus ártistan miehtá Sámi mángaloht jagi. Erenomáš vásáhussan šattai su ja Hedningarna musihkkajoavkku oktasaš konsearta Riddu Riđus sidjiide geat ledje doppe.

Wimme eanemus rámiduvvon cd-skearru doalvvui su olu konseartamátkiidde miehtá máilmmi, muhto min guovllus son ii leat guhkes áigái fitnan, ja danne illudat mii sakka dassáigo boahtá, čállet lágideaddjit preassadieđáhusasteaset.

Gámasmohkkilaš nuorra almmái Ailu Valle boahtá ođđaáigásaš hip-hop musihkain.

Politihkkálaš teavsttat dan dehálašvuođa luonddu- ja sámi eallinvuogigáhttemis leat dovdomearkan.

Iežas musihkka leage su dolvon miehtá Eurohpá. Valle rámiduvvo maid olu su lávdeshowaid geažil.