Vuvddii áhčis govaid Sápmái

RiddoDuottar Musea/ RDM, lea oasttán dánskalaš Gitz Johansena dáidagiid, govaid maid son lea ráhkadan go mátkkoštii Sámis 1930-logus.

Dánskalaš dáiddár Gitz Johansen mátkkoštii Sámis olles 23 geardde, ja sárggui ja njuođai govaid das maid oinnii Sámis.

Johansen, guhte elii 1897 rájes 1977 rádjai, mátkoštii maid Ruonáeatnamis, gos maid njuođai olu govaid.

Bárdni rabai govvačájáhusa

Dál leat RiddoDuottarMusea dáidamágasiinnas oktiibuot 178 dáidaga maid Gitz Johansen lea ráhkadan. Musea lea gieskat vel oasttán 100 gova dáiddára bártnis, Jeppe Gitz Johansenis.

Gieskat rabai dáiddára bárdni čájáhusa RDM-Sámiid Vuorká-Dávviiriin Kárášjogas.

Čájáhusas lea vejolaš oaidnit 47 dáidaga maid Gitz Johansen lea ráhkadan.

Sámegovain eai beroš Dánmárkkus

Jeppe Gitz Johansen muitala iežas váldán badjelasas rájadit áhčis govaid, maŋŋil go su eadni vel jámi. Dađibahábut ii lean sus gos daid rájada, eaige dánskalaččat beroš oasttit govaid mat gullet sámi kultuvrii.

– Son movttáskii go RiddoDuottar Musea bargi Gry Fors bođii geahččat áhči govaid, ja son fálai de 100 000 ruvnnu 100 gova ovddas, ja nu dat šattai gávpi, lohká. Johansen.

Govat Sápmái rádjui

Dál illuda Gitz Johansena bárdni, Jeppe Gitz Johansen, go áhčis govat leat beassan rádjui Sápmái.

Sámis ge leat duhtavačča go govat leat boahtán davás.

– RiddoDuottar Museas sii ge illudit go ná olu govaid leat fitnen rádjui, govat mat muitalit sámi kultuvrras ja inuihttaid kultuvrras, lohká RDMa diehtojuohkki Anita Bjørnback.