Karen Anne Buljo lea čállán gullugova man namma lea Pelle njoammil. Buljo lea dovddusis čálli. Son lea čállan divttaid ja lea maid čohkken ja juoigan cd:ii ovddeš mearrasámi luđiid. Dál ráhkada Davvi Girji gullugova maid son lea čállán.
Ollugat neavttastit
14 neavttára leat dás mielde, vel skuvllamánetge leat fitnan veahkkin neavttasteamen veahkkin gullugova Risten Iŋggá vuosttaš skuvllabeaivvi.
Váldorolla neavttár
Risten Ánne Grønmo lea son gii neavttasta váldorolla gullugovas. Son lea dás viđa jahkásaš nieiddaš, ja go sus eai leat staohkanskihppárat de deaivvada son Pelle njoammilin. Álo go juoigan gullo, de ihttá Pelle njoammil.
Vuosttaš gullugovva
Davvi Girji lea lágádus mii lea bargamin gullugovain. Lágádusa beaivválaš jođiheaddji Máret Alehttá Utsi muitala Pelle njoammil gullugova leat vuosttaš gullugovvaprošeavtta mainna lágádus lea bargamin. Son lohpida eanet gullugovaid, muhto álggos galgá vuos Pelle njoammil ilbmat cd:ii ja dasa galget vel govvagirji ráhkadit. Pelle njoammil gullugovva galgá gárvánit skábmii.
Nuorra neavttár
Mats Petter Utsi neavttasa ges Ándina. Son muitala barggu leat oalle somán, ja dákkár barggu son gal gillešii maŋŋelisge dahkat.
Dovddusis neavttár bagadallá
Sverre Porsanger dat bagadallá gullugova neavttáriid. Son muitala leat dehálažžan hápmet jietnagovaid nu ahte dat šaddet lunddolačča. Muhtimat neavttáriin, sii geat leat váldodoaimmas galget gullot lahka, earát geat maid gullojit, muhto eai leat justa dalle guovddážis, fokusas, sii galget gullot guhkelis, duogábealde. Jietnahápme lea danne hui dehálaš, muitala Sverre Porsanger.