NRK Meny
Normal

Vuosttaš cummás son álggii čállit, dál lea son beakkánis girječálli

Vuosttaš cummás son čálii dalle go álggii čállit ja vuovdalit teavsttaidis. Dalle son gal lei áibba nuorra, muhto bláđđi «Romantikk» dat gal ostii sus muitalusaid. Nie son fidnegođii tietnasa čállinbargguin, muitala girječálli Marry Ailonieida Somby.

Marry Ailonieida Somby ja Kåre Balto

Sámedikki girjerádjosa bargi Kåre Balto jearahallá girječálli Marry Ailonieida Somby.

Foto: Anne Olli

1976 rájes leat sus almmustuvvan oalle máŋga girjji, guhtta dáin leat mánáidgirjjit. Son leage vuosttaš girječálli gii almmustahtii mánáidgirjji sámegillii.

Dán jagi lea son maid árvaluvvon Davviriikkaid Ráđi girjjálašvuođa bálkkašupmái girjjiin «Čerbmen Bizi - Girdipilohtta».

Vástádusat illudahtte guldaleaddjiid

Marry Ailonieida Somby vástidii Balto gažaldagaide nu suohttasit ahte guldaleaddjit besse njálgát reaškkihit.

Earret eará muitalii son mo soai Britta Marakatt Labbain mátkkošteigga olu guovlluin, go soai leigga ráhkadan teáhtera uhca stáloš girjjis.

Dainna oaččuiga buorre tietnasa.

– Nu suittii Britta broderet ja mon ges suiten čállit, lohká Somby.

Sámi girjjálašvuođabeaivviin Sámedikkis

Sámi girjjálašvuođabeaivviin Sámedikkis

Foto: Anne Olli

Árvaluvvon girjjálašvuođa bálkkašupmái

Girjjiin «Čerbmen Bizi - Girdipilohtta» lea Marry Ailonieida Somby árvaluvvon girjjálašvuođabálkašupmái.

Dán girjji muitala čállán danne go son lea sámi tv:s oaidnán ja gullan ahte sámi bohccot leat vaikke makkáraš doaimmain mielde. Muhtimat leat gilvohearggit, earát ges filbmanásttit, na vaikke makkárat.

– Dáinna girjjiin doaivvun diehttalasat fasket vuoittu Davviriikkaid Ráđi girjjálašvuođa bálkkašumis, lohká son.