Hopp til innhold

Gáliiga bálgáid earáide

20 jagi áigi lei bohccobiergu haddi nu vuollin ahte eaba oaidnát eará vejolašvuođa go ieža álgit vuovdit bierggu. Nu álggaheigga Anders P. Bongo ja Maret Gutnel Bongoi fitnodagá.

Reinkjøtt Marked eaiggádat
Foto: Anne Randi Solbakken / NRK

GULDAL ÁŠŠI:

Iešguđetlágan buktagat

Vuoššanbiergu, suovasbierggu ja goikebiergu leat dušše muhtin dain gálvvuin máid vuovdiba iežaska Reinkjøtt Marked gávppis. Go eaba bargga biergguin, de soai duddjoba. Soai vuovdiba maiddái luhkaid ja ullokártáŋggaid.

Fertiiga álgit ieža vuovdit

Máret Gutnel Bongo
Foto: Anne Randi Solbakken / NRK

Máret Gutnel muitala ahte eaba ásahan fitnodagá suohtas dihte. Heajos biergohaddi lei šaddamin roassun bearrašii. Ja viesu eamit šattai measta váldit dienasbarggu olggobealde bearraša doalu, muhto dán ii hálidan. Sihke Máret Gutnel ja Ánte hálideigga oažžut eallámuša árbevirolaš boazodoalus.

Niehku ollášuvvui

Go Norgga eiseváldit de ráhkadedje lágaid ja njuolggadusaid boazoeaiggádiid várás geat ieža hálidedje vuovdit iežaset bierggu, de beasaiga ásahit fitnodagá ja vuovdigaohtit ieža bierggu. Ja otne leaba gávdnat muttát biergohivvodagá máid jođiheaba. Fitnodagáin ealiheaba iežaska.

Produkter av Reinkjøtt Marked
Foto: Anne Randi Solbakken / NRK

Soai mearrideigga ahte áiguba vuoddjit báikkis báikái ja nu fáluhit ja vuovdit bohccobierggu olbmuide olggobealde gávppiid. Bongg Ánte muitala ahte olbmot bures liikojedje go soai álggiiga gávpešilljuid olggobealde vuovdit bohccobierggu. Go viimmat lei bohccobiergu fitnemis.

Korte nyheter

  • Ođđa sámediggeválggaid ferte lágidit maŋimustá geassit

    Sámedikki ságadoalli Pirita Näkkäläjärvi ii sáhte vel dadjat, maid ođđa válggaid lágideapmi johtilis áigetávvaliin mearkkaša, dieđiha Yle Sápmi.

    Alimus hálddahusriekti (AHR) dagai historjjálaš mearrádusa, go mearridii vuosttaš geardde, ahte Suoma sámediggeválggaid galgá lágidit ođđasit.

    Ođđa válggaid galggašii sámediggelága mielde lágidit guovtte olles mánu geažes das, go válggaid gomiheames lea mearriduvvon.

    AHR presideanta Kari Kuusiniemi dulkojumi mielde ođđa válggaid galgá lágidit geassemánu loahpa rádjai.

    Pirita Näkkäläjärvi
    Foto: Ođđasat / Yle Sápmi
  • Eai beasa gieldda gohčodit Pajalan kunta

    Ruoŧa ráđđehus hilgu Pajala gieldda ohcamuša geavahit meänkieli nama «Pajalan kunta» gieldda bálddalas namman, čállá Fria Tider áviisa.

    Ráđđehus mieđiha, ahte lea vuogas čalmmustahttit veahádagaid ja nannet veahádatgielaid.

    Almmatge deattuha ráđđehus, ahte ii ovttage gielddas Ruoŧas leat eambbogo okta almmolaš namma. Sii livčče spiehkastan dás jus livčče dohkkehan ohcamuša.

    Fertešii lágaid rievdadit jus galggašii sáhttit gielddaide dohkkehit eambbogo ovtta nama.

    Meänkieli
    Foto: Svenske Tornedalingers Riksforbund – Tornionlaaksolaiset
  • Gielddaluohti bohciidahttá digáštallama

    Gáivuona gielddastivra evttoha dohkkehit sierra luođi gielddaluohtin. Dát ii oro buohkaid mielas nu buorre jurdda, go sin oaivila mielde ii leat Gáivuonas iežas juoiganárbevierru.

    – Mun in leat luođi vuostá. Luohti lea juoga mii gulai ja ain gullá boazodoalliide ja sámiide geain dát lea oassi iežaset kultuvrras, čilge gáivuotnalaš Levin Mikkelsen.

    Guovddášbellodaga gielddastivrraáirras Svein Oddvar Leiros dat evttohii, ahte Gáivuonas galggašii leat gielddaluohti. Son ii leat ovttaoaivilis Levin Mikkelsen čilgehusain.

    Guovddášbellodaga gielddastivrraáirras Svein Oddvar Leiros dat evttohii, ahte Gáivuonas galggašii leat gielddaluohti. Son ii leat ovttaoaivilis Levin Mikkelsen čilgehusain.

    – Min gielddas lei dáruiduhttin dievaslaš. Dákkár oaivilat gullet dan áigái. Su suokkardallan čájeha, ahte Gáivuonas juigojuvvui. Nu ahte ii leat duohta ahte Gáivuonas ii leat juigojuvvon, lohká Leiros.

    Herman Rundberg ja su joavku Manne dat leat ráhkadan dán luođi.

    – Luođi mihttomearri ii lean suhttadit olbmuid, muhto digáštallan lea bures boahtin, árvala Rundberg.

    Gáivuona gielddastivra ávžžuha sidjiide ovddidit máhcahemiid gielddaluođi birra. Áigemearri lea dán mánu maŋimuš beaivve.