Dála l Ingebjørg.
«Dálla má dahpáduvvá» la MGPjr:a 2022 tiebmá. Ja MGPjr la má 20 jage dálla.
Dán jage oadtjup ådå gielav MGPjr:n gullat – Ingebjørgas! Sån lávllu julevsámegiellaj, mij la ájtedum giella.
Riek ávon
Ingebjørg la dåjmalasj næjttso, ja gå lij unnagasj de máhtij lávllot åvdås gå riekta láhkáj máhtij ságastit.
Dálátjij la Ingebjørg lávllagijt ja dánssav åvddånbuktám Sáme nasjonalbiejven, ja de lávllagijn UKM:n oassálasstám mav la iesj tjállám.
Ja sujna lij juo åtsådallama mij guosská juojddá åvddånbuktet. MGPjr:an lávllot la juoga mij dagu sunji luondulasj la.
– Usjudaláv dát la ájbas buorre, ja riek ávon lav gå lij mujna dakkár vejulasjvuoda, javllá gijttogis finalissta.
Ittjij vuollána
Ingebjørgan lij juo unnagattja rájes doajvvo akti ájgenis MGPjr:a sienan tjuodtjot. Åhtsåm la gal åvddåla, ja juska ittjij goassak besa, de ittjij goassak vuollána.
Niegon dáv gitta anedit dahkam la nav vaj sienan bæssá tjuodtjot moarmesmáno 28. biejve aktan 13 ietjá finalistaj siegen dievas Telenor Arenan Oslon.
– Dat la harmmat buorre ja ij la rat jáhkedahtte. Dåbddu dagu nav moattes e dáv vejulasjvuodav oattjo. Ij la rat jáhkedahtte mån moadda iehtjádij gaskan besav dájda suohttasijda maŋen.
Ávvus ájnas gielav vuosedittjat
Lávla mav Ingebjørg galggá lávllot la iesj tjállám.
– Ja de l maŋemus ájge mujna hállo nuppijda vuosedittjat moadda ássje lij mujna ma máhtti iehtjádijt vuorbbádahttet. Jus i ájádalá dav mij vuorbálattjan dahká, de ij dav diede. Ja dajna de ij vuorbálattjan sjatta.
Ingebjørgan lij hállo julevsámegielav maŋen dán lávllagin gå giella l árvulasj sunji. Sierraláhkáj de dav oasev ávvudallá vuosedittjat.
– Ja dan muv lávllagin la aj sáme oasse, nav vaj dasi de ávvusav iehtjádijda vuosedittjat. Dat la oasse mujsta, ja dajna de dav sidáv maŋen.
– Værálda buoremus leirskåvllå
Agnete Saba lij vuostak gut MGPjr:n sámegiellaj lávloj. Ietjas musihkkajuohkusijn «The BlackSheeps» nuorttasámegiellaj lávllun «Oro jaska, beana».
– Nav suohtas gå nuora sámevuodav sihti tjalmostit. Dat la nav kult. Mån sidjida hieddjiv, javllá åvdep MGPjr-vuojtte.
Suv miela la nav tjáppa lávlla. Njuorastij ja mihástaláj gå guláj Ingebjørg julevsámegiellaj lávloj.
Daj gudi boahtteájggáj MGPjr:j galggi sæbrrat, javllá sån dat la jasska siedna gånnå ålov hárjjidalli åvddål live. Suv buoremus ráde Ingebjørgaj ja da ietjá nuora gudi galggi sæbrrat la dåssju suohtastallat.
– Værálda buoremus leirskåvllå basically!
Iehtjádijt arvusmahttá
Ingebjørg vádtsá Hábmera kultuvrraskåvlån. Skåvlå jådediddje Svein Schultz ávvus suv åvdås.
Doajvvu dát dahká oadtjup ienep julevsáme lávllagijt, mav sån jáhká dahká julevsámegiella bissu.
– Gå dát tjáppa giella sáddiduvvá NRK:n buoremus sáddimájgen la ihkeva stuorra, javllá sån.
Geldulasjvuohta l stuorak
Galla l dal tjierggisvuohta Ingebjørgan dálla finála åvdån.
– Ájnna mav de dagáv la ávvusit majt ber nagáv, ja ij ilá dan birra usjudallat. Jus nav de iv rat ijájt besa oadet.
Ja gå de lávlla l almoduvvam la, da la dagu baldos, ja sæmmi bále ávvo. Valla ienemusát la de Ingebjørg mihástallá, ja sunji l buorre dåbddo gå dát stuorra tjiegosvuohta l ierit - lávllá «Her e æ».