– 2018 rájes boahtá lágiduvvot Conifa World Cup nissoniidda maid, ja danin leat mii mearridan boahtte dálvvi čohket Sámi nissoniid riikajoavkku, ja čiekčat Beardugoržžis, dadjá FA Sámi presideanta, Håkan Kuorak NRK Sápmái.
Son deattuha ahte ovdal Conifa World Cupa lea erenoamáš dehálaš oažžut johtui Sámi riikajoavkku.
FA SÁPMI: Sámi spábbačiekčama hoavda, FA Sámi presideanta, Håkan Kuorak dadjá ahte dál áigut vuoruhit nissonjoavkku.
Foto: Dan Robert Larsen / NRKDán rádjai ii leamaš ollu aktivitehta Sámi nissoniid joavkkus, muhto presideanta lohpida ahte dál galgá dát rievdat. Joavku ii leamaš čoahkis das rájes go ođđa sámi spábbačiekčanlihto ásahuvvui.
– Sámis leamaš nissonjoavku mielde Arctic Winter Gamesas, ja sii leat dál rivttes agis čiekčat riikajoavkkus, dadjá Kuorak.
Norggameaštáris stuorra vuordámušat
Norggameašttir Grand Bodø joavkkuin, ja sápmelaš moallavákta gii lea ožžon ollu rámi, lea Marja Sofie Holmestrand Hætta (22). Son lea ilus gullat ahte dál šaddá Sámi nissonjoavku.
– Maŋemuš go mis lei Sámi nissonriikajoavku čoahkis lei 2010:s Biŧomis (Piteå journ.meark.), ja leat dan rájes gullan ahte dál de galgat čoahkkanit sihke Spánjas ja Itálias, muitala Holmestrand Hætta.
Dál lea su mielas mannan guhkes áigi, ja dattetge lea áigi ahte viimmat boahtá johtui fas Sámi nissonriikajoavku.
VUORDÁMUŠAT: Sápmelaš moallavávttas, Marja Sofie Holmestrand Hættas, leat dál stuorra vuordámušat.
Foto: Lasse Holmeslet– Mus leat dál oalle stuorra vuordámušat, jus dat dollet dan maid dadjet de sávvamis šaddá buorre.
Son dadjá ahte lea dehálaš ahte sápmelaš nissončiekčit besset čoahkkanit ja ovttas čiekčat.
– Dat gávdnojit mis hui olu buori čiekčit dáppe Sámis, ja mu mielas lea hui dehálaš ahte mii beassat ovttas čiekčat ja dan láhkai oahpásmuvvat, dadjá Marja Sofie Holmestrand Hætta.
Conifas lea áigumuš – muhto eahpesihkar
LEA DÁHTO: Conifa-presideanta, Per Anders Blind, dadjá ahte sus lea jáhku, muhto ahte dárbbašuvvo veahki jus galgá vejolaš lágidit nissonjoavkkuide Conifa máilmmimeašttir gilvvuid.
Foto: Kjell Are Guttorm / NRKConifa presideanta Per Anders Blind, duođašta NRK:i ahte sis lea áigumuš lágidit nissongilvvuid Londonis 2018:s. Dattetge sáhttá šaddat nissonjoavkkuide Conifa World Cup boahtte háve go gilvvut lágiduvvojit.
– Dál leat gávcci Conifa mielláhtuin nissonjoavkkut, ja mii leat maid jearran gallis háliidivččet searvat jus mii lágidat nissoniidda Conifa World Cup čiekčamiid, ja leat gávcci vel riika geat dadjet ahte sii searvvašit, muitala Blind.
Son dadjá maid ahte Londonis lea sierra olmmoš gii bargá nissonspábbačiekčamiin, ja dattetge lea jáhko ahte lea vejolaš čađahit dan.
