NRK Meny
Normal

Vuolláičálle álgoálbmotoahpahusa ovttasbargošiehtadusa

Kalaallit Nunaat, Manitoba, Nunavut ja Sámediggi leat formaliseren ovttasbarggu álgoálbmotoahpahusa birra.

Vuolláičállet šiehtadusa
Foto: Berit Solveig Gaup/NRK

– Dat lea dehálaš danne go dál lea ovttasbargu nannejuvvon bajemus politihkalaš dásis. Mii leat daid politihkalaš orgánaid bealis cealkán ahte mii leat duogábealde dan ovttasbarggu, ja dat dieđusge geatnegahttá min searvat ovttasbargui maiddái ruđalaččat ja addit ásahusaide ja fágabirrasiidda dan politihkalaš doarjaga maid dárbbašit, lohká Sámedikki presideanta Aili Keskitalo.

Áigot buoridit álgoálbmotoahpahusfálaldaga

Keskitalo lohká ovttasbargošiehtadusa maid dehálažžan dan dihte go sis leat buohkain ambišuvnnat buoridit oahpahusfálaldaga álgoálbmot mánáide ja nuoraide.

– Dat mearkkaša sávvamis ahte mii nannet min oktavuođaid ja nannet maid fágalaš ovttasbarggu gaskal daid iešguđet guovlluid ja álbmogiid. Mis leat nu olu oktasaš vásáhusat ja hástalusat, ja mii dárbbašit várra oahppat nubbi nuppis ja inspireret nubbi nuppi oaidnit vejolašvuođaid.

The Arctic Indigenous Education Conference 2016

Ovttasbargoguoimmit deaivvadedje Árktalaš eamiálbmot oahppokonferánssa oktavuođas, mii dál lágiduvvo Guovdageainnus

Foto: Berit Solveig Gaup/NRK

Oahppokonferánssa lágidit juohke goalmmát jagi

Ovttasbargoguoimmit deaivvadedje Árktalaš eamiálbmot oahppokonferánssa oktavuođas, mii dál lágiduvvo Guovdageainnus. Keskitalo geassá ovdan konferánssa ovdamearkan ovttasbargui.

– Dán vahku lágida Sámediggi ovttas Sámi allaskuvllain stuora arktalaš eamiálbmot oahppokonferánssa, gos dutkit, fágačeahpit ja oahpaheaddjit deaivvadit ja ohppet nubbi nuppis. Dat lea vuođđun dan jurdagii ahte buoridit oahpahusfálaldaga, maiddái sámi mánáide ja nuoraide.

Lea oassin dán šiehtadusas ahte dákkár konferánsa galgá lágiduvvot juohke goalmmát jagi.

Vuolláičálle šiehtadusa

Kalaallit Nunaat, Manitoba, Nunavut ja Sámediggi leat formaliseren ovttasbarggu álgoálbmotoahpahusa birra.

Foto: Berit Solveig Gaup/NRK

Northwest Territories ii vel vuolláičállán

Northwest Territories Canadas lei maid bovdejuvvon vuolláičállit šiehtadusa, muhto Northwest Territories ii vuolláičállán dán vuoro šiehtadusa.

– Doppe leat leamaš válggat ja doppe lea ođđa ráđđehus. Sii dárbbašit veahá áiggi ovdalgo servet šiehtadussii. Daid signálaid mielde maid leat ožžon odne lea buorre vejolašvuohta ahte dahket dan ja sii leat maid geažuhan ahte sáhttet árvvoštallat maid lágidit boahtte konferánssa.

Maiddái eará guovllut leat fállan lágidit boahtte oahppokonferánssa.

– Lean ilus go sihke Northwest Territories, Manitoba ja Ruonáeatnama bealis leat dadjan ahte sii sáhttet árvvoštallat lágidit konferánssa.

Grønlands utdanningsminister Nivi Olsen

Kalaallit Nunaata oahpahus-, dutkan-, kultur- ja girkoministtar Nivi Olsen

Foto: Berit Solveig Gaup/NRK

– Hui dehálaš ovttasbargat

Kalaallit Nunaata dahje Ruonáeatnama oahpahus-, dutkan-, kultur- ja girkoministtar Nivi Olsen lei Kalaallit Nunaata bealis vuolláičállime šiehtadusa Guovdageainnus.

– Mu mielas lea hui dehálaš ahte mii ovttasbargat arktalaš guovlluin. Mii leat hearkkit, ja min birra leat gievrras našuvnnat. Mis leat dehálaš ja buorit resurssat min guovlluin, ja jus eat váldde oahpahusa, de sáhttit manahit resurssaid maid eat ieža geavat, lohká Olsen.

Son lohká ahte sii eai leat arktalaš guovlluin gulahallan doarvái bures, muhto go dál leat vuolláičállán ovttasbargošiehtadusa, de sáhttá váldit oktavuođa ovttasbargoguimmiiguin ja jearrat sis veahki.