Vuolláičállába viimmat šiehtadusa gávpotsámiide buorrin

Makkár sisdoallu šiehtadusas lea, álmmuhuvvo easka maŋŋá vuolláičállima.

Muhto dál juo iktá sámediggeráđđelahttu, Ann-Mari Thomassen, NRK:i dehálaš oasáža.

– Oslo suohkan šaddá šiehtadusas miehtat dasa ahte gávpoga sámi mánáidgárddis galget leat sámegielhálli bargit – ja sámegielat pedagogat.

– Ja dat leat čielga bohtosat dán šiehtadusbarggus, ja dat leat čielga signálat, lasiha son.

Guovvamánu 6. beaivve vuolláičállába Oslo gávpotráđi jođiheaddji, Raymond Johansen (Bb) ja sámediggepresideanta Aili Keskitalo (NSR), šiehtadusa.

Dan dahkába Oslo suohkana Sámi álbmotbeaivvedoaluin, Oslo ráđđeviesus tiibmu 10:45.

• Loga maiddái: Riidu sámi álbmotbeaivvi doallobileahtaid nalde Oslos

– Fiinna rámma

– Mun gal illudan dasa. Dat lea gal váldán veahá áiggi. Muhto proseassa lea leamaš nu buorre, ja dál dat gal lea buorre oktavuohta Oslo suohkaniin, go mii han leat juo nu dávjá deaivvadan maŋimuš áiggiid. Lean viehka duhtavaš sisdoaluin vel, ja ahte šiehtadus viimmat lea sajis, muitala Ann-Mari Thomassen.

– Ja šiehtadus vuolláičállojuvvo sámi álbmotbeaivvedoaluin, Oslo ráđđeviesus, vel. Mo dat šaddá?

– Jo, dat gal lea hui fiinna rámma. Oslo suohkan viimmat čájeha ahte váldá gávpotsápmelaččaid duođalažžan, ja suohkan dán láhkai dovddasta ahte das lea ovddasfástádus áimmahuššat oaivegávpoga sápmelaččaid.

• Loga maiddái: Dutkit árvalit rievdadit sámedikki mánáidgárdedoarjaga