Diibmu 14.45 čikčet sii Tornado/Måløy vuostá, ja Guovdageainnu čiekči Lina Therese Eira illuda čiekčat A-loahppačiekčama ja vuordá ahte sii vuitet čiekčama.
– Mun gal vuorddán ahte mii vuoitit dán čiekčama, dat lea goit mu mihttomearri, dadjá son.
Lina Therese Eira ii dieđe nu olu Tornado/Måløy birra, gean vuostá odne čikčet.
– Mun in leat čuvvon mielde movt dat joavku lea čiekčan, go eat mii diehtán ovdal odne gean vuostá mii galgat čiekčat, muitala son.
– Jáhkán mii nagodit časkit sin
Ikte vuoittáhalle Guovdageainnu nieiddat 13-1 Åheim vuostá maŋemuš álgočiekčamis, muhto Lina Therese Eira ii jáhke ahte Tornado/Måløy lea lihka buorre, ja ahte sii galget nagodit časkit sin.
– Mun gal jáhkan ahte mii nagodit časkit sin, muhto ii spábbačiekčamis dieđe goassege, muitala son.
Jus Guovdageainnu nieiddat vuitet čiekčama mii álgá diibmu 14.45, de lea sis odne eahkes vel okta čiekčan, namalassii njealjádasfinála.
– Min guokte vuosttáš čiekčamat ledje hui buorit, ja sávvamis mii odne čiekčat buorebut go ikte. Jus odne vuoittáhallat, de eai leat mis šat čiekčamat ja mii háliidit vuoitit vai mii beassat eanet čiekčat, čilge Eira.
Bártnit vuoittáhalle
Guovdageainnu 15-16 jahkásaš bártnit vuoittáhalle odne 1-0 Ranheim vuostá A-loahppačiekčamis, nu ahte sii eai šat beasa čiekčat eanet. Ja Lina Therese Eira gal háliida čiekčat eanet.
– Livčče váivi jus mii eat ge beasa šat čiekčat eanet. Mii gal háliidat beassat gitta finálii, nu ahte mun gal sávan ahte mii čiekčat nu bures ahte dat doalvu min gitta finálii, muitala son.
Stuora vásáhus beassat čiekčat Norway Cupa
Čiekčat Norway cupas lea stuora vásáhus, ja nu lea Line Therese Eira mielas maid.
– Dat lea leamašan hui somá čiekčat dáppe ja mun lean oahpásnuvvan ođđa olbmuiguin ja lean maid gávdnan ođđa olbmáid, dadjá son.