– Lean nu giitevaš, in lean dán gal vuordán. Munnje lea nu movttiidahtti ja illudahtti ahte illá leat sánit dan čilget, lohká Jusse Juhán Niillasa Gáre Márjá.
Stuorra mojiin válddii son vuostá bálkkašumi Sámedikki dievasčoahkkimis Kárášjogas.
– Giittán min ovddit buolvvaid, geat min leat oahpahan, logai sártnistis.
Eira Buljo lea Guovdageainnus eret. Son lea earret eará buvttadan máŋga oahppogirjji.
Sámis dáidet ollugat dovdat su áŋgiris servvodatberošteaddjin. Árbevirolaš máhttu lea fáddá mas son erenoamážit berošta.
Eallinagi áŋgiruššan
Sámediggepresideanta dat geigii giellamovttiidahttin bálkkašumi Gáre Márjái.
Aili Keskitalo deattuha ahte eallinagi áŋgiruššama dihte oažžu son dán bálkkašumi.
– Jusse Juhán Niillasa Gáre Márjá lea iežas bargguid bokte čilgen sámi árvvuid, árbevieruid ja movt dat leat čadnon gillii. Dán son lea dahkan vuollegašvuođain ja ráhkisvuođain sámegillii ja sámi kultuvrii, dadjá Keskitalo.
- Loga maid:
– Beasan miehtebiggii bargat
Giitosártnistis Sámediggái muittuhii bálkkašumi vuoiti ahte dáruiduhttima geažil leat sámi giellageavaheaddjit gierdan garra vuostehágu.
Son lea giitevaš go stuorraservvodagas ge lea áddejupmi dasa ahte sámegiella lea riggodahkan ja ferte seailluhuvvot.
- Loga maid:
– Dáruiduhttin lea nu garrasit váikkuhan sámi servvodaga, ja guhká lei dego vuostebiggii bargat. Dál dovddan ahte beasan miehtebiggii bargat, ja olbmot háliidit oahppat sihke giela ja dan mii birastahttá giela, lohká son.
Sámegiella lea goit su váimmu láhka buot doaimmain árgabeaivvis, dovddaha Eira Buljo.
– Giella lea čadnon bargguide, ja min barggut ges čadnon eatnamiidda, dálkkiide ja čázádagaide, dadjá Eira Buljo.
- Loga maid:
čihččet vuoiti
Dán giellabálkkašumi oažžu olmmoš gii lea bidjan ollu návccaid nannet, ovddidit ja seailluhit sámegiela.
Bálkkašupmi juhkko juohke njealját jagi ja Sámediggi oaččui 8 evttohusa bálkkašupmái dán jagi.
Sámi giellaráđđi dat ásahii giellamovttiidahttinbálkkašumi jagi 2000. Dan maŋŋel lea Sámedikki giellastivra ja sámediggeráđđi juolludan bálkkašumiid.
Sámedikki giellamovttiidahttinbálkkašumi ovddeš vuoitit leat:
- Divttasvuona váhnenjoavku 2000:s
- Skániid giellajoavku 2001:s
- Harry Solhaug Gáivuonas 2002:s
- Sagka Stångberg Deartnás 2009:s
- Iŋgor Ántte Ánte Mihkkal/Ánte Mikkel Gaup 2013:s.
- Jane Astrid Juuso Unjárggas 2017:s
Bálkkašupmi lea 50.000 ruvnno ja dáiddadiploma, man dáiddár Kamilla Triumf lea hábmen.
- Loga maid:
- Loga maid:
- Loga maid: