Dej minngemes jaepieh jienebh jïh jienebh almetjh lea aalkeme bikinifitnessinie gaahtjedh. Aina Lisa Wilks (23) Snåaseste lea akte dejstie. Aarkebiejjesne dïhte learohke HINTsne, jïlleskuvlem Noerhte-Trøøndelagesne, edtja lohkehtæjja sjïdtedh. Dïhte aaj tjidtjie gøøkte smaave maanide.
Aina Lisa iktesth lyjhkeme saavredh, jïh lea bikitifintness dåeriedamme. Mohte mænngan gøøkte maanah åådtjeme, idtji vïenhth edtji maehtedh gaahtjedh. Dellie pryøvemisnie lij, jïh dïhte gujhth hijven gåeredi. «Øøvre luste sjïere ulmie saavrine utnedh», Aina Lisa Wilks jeahta.
Saavredh guktie tjåadtjodh
Ij leah nuekies vïjhte biejjh våhkosne saavredh jïh soejkesjemelaakan byøpmedidh. Tjuara aaj saavredh guktie edtja scenesne tjåadtjodh.
– Guktie dle gaajhkem buektehte? Skulve, saavreme jïh gøøkte smaave maanah. Jïh gåessie saavra?
Aina Lisa soptseste hijven gåerede gaajhhkem buektiehtidh. Lohkehtimmiem lea gaskeviermien tjïrrh, praktihke jïh tjåangkoejgujmie. Gosse ij naan praktihke, dle maahta biejjegen saavredh. Gosse maanide maanaj-giertesne jïh dïhte lohkehtimmie åtna, dle pråvhka lohkehtimmien bijjelen jallh åvtelen saavredh, jallh iehkeden gåessie maanide åerieh, mejtie naakene gåetesne syjhtede.
Buerie moenedimmieh
Voestegh idtji maam jiehtieh dom bijre ahte edtji aelkedh gaahtjedh. Dïhte billi mah almetjh edtjin jïehtedh. Dan raajan barre buerie moenedimmieh åådtjeme jïh tuhtjie gaajh luste.
Njoktjen 28n.b scenesne voestes aejkien tjåådtje, jïh Aina Lisa gujhth disse ånnetji kråvvede. «Im manne dam gåessie gænnah dorjeme», Wilks jeahta. Dïhte veanhta jïh hååhkesje hijven gåerede, jïh dïhte jeahta ahte læjhkan guktie sjædta, dle gujhth buerie dåårjehtimmiem åådtje!
Govlh aamhtesem Aina Lisajne: