NRK Meny
Normal

Voestemes åarjelsaemien maanaj gærhkoe-gærja

Saemien åålmegebiejjien edtjieh daam orre maanaj gærhkoe-gærjam gellie sijjine vuesiehtidh.

Sørsamisk kirkebok

Illustrasjovneguvvie Mijjien gærhkoe-gærja.

Foto: Kirken.no / Kirken.no

– Gærja mij sjeahta abpe fualhkan, edtja vadtesinie sjïdtedh åarjelsaemien maanide gïeh njieljien jaepien båeries. Gærja joekoen tjaebpies, Tore Johnsen, Saemien gærhkoeraerien beajjetje åvtehke jeahta.

Tore Johnsen, generalsekretær i Samisk kirkeråd

Saemien gærhkoeraerien åvtehke Tore Johnsen.

Foto: Berit Nystad / NRK

Saemien åålmegebeajjan dellie gærjan tjaelije Anne-Grethe Leine Bientie Tråantese båata. Ellen Sara Reiten Bientie gie guvvide dorjeme, aaj Tråantese båata gosse almetjh voestes aejkien åadtjoeh dam orre gærjam vuejnedh.

–Joekoen geerjene sjidtim, gosse daam tjaelije barkoem åadtjoejim. Dihte vuesehte almetjh munnjan jeehkin, edtjim daam buektiehtidh. Geerve orreme jih saemien gïelesne tjaeledh, jeatjah-laakan tjuara daroen giïeleste ussjedidh Anne-Grethe jeahta.

Saemien gærhkoeraerie gærjam dongkeme mij åarjelsaemien raedtesne dorjesovveme.

Saemien vuekie jïh saernieh bijpielistie.
Mijjen gærhkoe-gærja / Vår kirkebok mijjem baaja åarjelsaemien maanaj gïeline, kultuvrine jïh jielieminie åahpenidh – jïh Laarine.

Åadtjobe lohkedh guktie Laara åådtje saernieh Jeesusen jïh gærhkoen bïjre govledh. Saernieh mah aejlies gærjesne tjaalasovveme, jïh åarjelsaemien åssjalommesh jïh vuekie gærjesne ektene leah. Naemhtie Laara altese slïekten, eatnemen, dajven, jaahkoen jïh åssjalommesi lïhkebe båata.

Tjaebpies jïh hïerves guvvieh buerie damtoem nænnoestieh gosse gærjam lohkebe. Gåabpah gïelide, åarjelsaemien jïh daaroen gïelem, maehtebe lohkedh.

Åarjelsaemieh gærjam eevtjeme

Åarjelsaemien åålmegeraerie åarjelsaemien dajvesne, idtji sïjhth naan daaroe-gïelen gærjam jarkoestidh åarjelsaemien gïelese. Åålmegeraerie stilli gærjam darjodh mij åarjelsaemien åssjalommesi jïh kultuvren mietie.

Orre saemien gærja.

Daate gærja mubpijste gærhkoe-gærjijste jeatjhlaakan. Saerniejgujmie boejhkelieh mij vihkele lea. Numhtie lea saemien vuekie jïh kultuvre. Gærjan nomme „Mijjen gærhkoe-gærja“ jïh ij „mov“, juktie sijhtieh vuesiehtidh ektievoete vihkele.

Laara fuelhkine jïh åålmeginie aktene. Slïekte, kultuvre, dajve jïh gærhkoe eah leah sinsitneste juakasovveme. Ektesne hov leah. Eatneme jïh almetje aktene.

– Aerebe eelkin gærjine barkedh, idtjimh ussjedh gærja dan hijven edtji sjïdtedh, Tore Johnsen jeahta. – Dïhte mij edtji gærjetje maanide sjïdtedh, gærja abpe fualhkan sjïdteme. Desnie aaj åarjelsaemien teologije maanide. Garmerdibie gosse daam gærjam maehtebe vuesiehtidh. Gaajhkesidie gïeh dejnie barkeme, gijhtebe, Tore Johnsen jeahta.

Vuesiehtimmie gellie sijjine.

Saemien åålmegebiejjien gærja-vuesiehtimmie Nidarosen stoere-gærhkosne jïh bïspegaertienisnie. Saemien Åålmege vuesiehtimmiem åtna Plassjesne, Aarportesne jïh Raanesne.