Venor ii heaittihuvo

Norgga boarráseamos lávvofitnodat ii heittohuva, rehketdoallu lea dohkkehuvvon.

Venor

Norgga boarráseamos lávvofitnodat Venor AS ii heaittihuvo.

Foto: Åse Pulk / NRK

Sis-Finnmárkku diggegoddi lei mearridan bákkus heaittihit Venor AS fitnodaga go fitnodat ii lean fuolahan rehketdoalu áiggil eiseválddiide.

Buot ortnegis dál

Daglig leder i Venor Johan Mikkel Bongo

Venor AS beaivválaš jođiheaddji Johan Mikkel Bongo.

Foto: Åse Pulk/NRK

Dál lea goitge fitnodat čorgen bábirhommáin ja diggegoddi mearridii ikte ahte oapmi galgá máhcahuvvot fitnodahkii.

Beaivválaš jođiheaddji Johan Mikkel Bongo lohká ahte vaikko lea diehtán ahte fitnodat bissu, de lei lihkká buorre oažžut dán dieđu diggegottis.

Bargu lei healban

Geasset dat diggegoddi mearridii bákkus heaittihit Venor fitnodaga. Dát lea dábálaš jus fitnodat ii leat doaimmahan dohkkehuvvon rehketdoalu, rehketdoallodárkkisteami ja jahkedieđáhusa almmolaš eiseválddiide rievttes áigái. Dán dahká diggi oasuslága vuođul. Bongo lohká dien barggu healban.

Diggi heaittiha ášši

Go fitnodat dál lea doaimmahan buot dieđuid eiseválddiide, de mearridii Sis-Finnmárkku diggegoddi ahte fitnodaga oapmi, dat maid eaiggáduššá, máhcahuvvo fas fitnodahkii. Diggi nu heaittiha ášši ja fitnodat joatká dego ovdal.