Vegard (19) sávvá vuoitit Norgga váimmuid sámi gielain ja kultuvrrain

Kárášjohkalaš Vegard Bjørsmo (19) lea dán jagi nuoramus «Stjernekamp» gilvaleaddji ja dál geasset lea ruovttus Kárášjogas ráhkkaneame čakčii.

– Mii oaččuimet bargobihttán válljet iežamet šáŋŋera ja mun smihtten ahte sámi musihkka lea šáŋŋer mii guoská eanemus mu identitehtii. Mu mielas lea sámi musihkka hui čáppa šáŋŋer, mii sáhttá olahit gehččiid, seammás go lea heivvolaš mu identitehtii, muitala Vegard NRKii.

Danin son leage válljen čoavdit vuosttaš bargobihttá lávlagiin, mii lea sámegillii ja mas maiddái leat juoiganoasit.

– Mis lea dehálaš historjá

Lávlla lea maid olu čadnon sámi historjái juoga maid Vegard lea diehtomielalaččat válljen.

– Mun orun Oslos dál ja dáppe eai leat nu olus, geat dihtet sápmelaččaid birra. Mun lean ieš hui sáhkkii ja jearan sis maid sii dihtet ja maid sii leat oahppan skuvllas, lohká Bjørsmo.

Go jerro makkár jurdagat sus ledje go válljii lávlaga, de sus lea dasa čielga vástádus.

– Válljejin dán lávlaga čájehan dihtii ahte mis sápmelaččain lea dehálaš historjá maid olbmot berreše dovdat ja ahte sámegiella maiddái lea ealli giella, čilge Bjørsmo.

Persovnnalaš muitalusat leatge doaibman bures su ovdamanniin Ella Marie Hætta Isaksenis (2018 vuoiti) ja Bilal Saabis (2019 vuoitis).

• Loga maid: Luđiin olli vuitui
• Loga maid: Davvi-Norgga fápmu

– Okta dain fiidnámus joavkkuin

«Stjernekamp» duopmár Mona B. Riise lea maiddái vuoiŋŋasteame geasseluomus muhto giđđat muitalii NRKii ahte son illuda sakka čakčii.

– Mu mielas lea dát okta dain fiidnámus artistajoavkkuin, maid lean oaidnán guhkes áigái ja mus leat alla vuordámušat dán sáttaáigodahkii, lohká Riise.

Go šaddá sáhka das, gii son dán jagáš joker sáhttá leahkit, de leat Riises olu jurdagat.

– Go čuožžu dás vuosttaš beaivvi, de ii dieđe goassege guhte vuoitá. Mii diehtit ain juo dan ahte oažžut stuorra musihkavásáhusaid, muhto kárášjohkalaččas Vegardas lea juoga, mii sáhttá šaddat hui gelddolaš, lohká Riise.

SMSas dadjá maiddái ahte illuda čuovvut Vegarda čakčat.

Váillaha eatnigiela

Vegard fárrii Áltái 15-jahkásažžan ja lea dan rájes beassan dovdat mo lea váillahit eatnigiela ja oahpes kultuvrra. Son muitala ahte go orui Kárášjogas, de sámástii beaivválaččat ja ii jurddašan dan sámegiela birra ovdalgo fárrii.

– In sámástan earretgo dalle go riŋgejin ruoktot ja go ledjen sámegiel diimmuin. Doppe lei dieđusge jeđđehus ahte vaikko eai lean nu olus geat hálddašedje sámegiela, de goit dovde kultuvra, lohká Bjørsmo.

Go fárrii Osloi, de váillahišgođii sámegiela eambbo ahte eambbo.

– Dáppe Oslos han galggašedje leahkit eanemus sápmelaččat muhto mun in beasa goassege sámástit, lohká Bjørsmo.

Dál go Vegard orru guhkkin eret ruovttus ja eatnigielas, de lea čanastupmi sámi kultuvrii sutnje mávssolaš.

– Váillahan giela ollu ja váillahan geavahit giela, luohti ja sámi musihkka šaddá dego dorvun munnje, čilge Bjørsmo.

Dáinna dorvvuin lávke maid «Stjernekamp» lávdái.

– Lávddis veahkeha lávlut sámegillii go dalle dovddan ja ádden sániid buoremusat, loahpaha Bjørsmo.

• Loga maid: Gucci, čiŋat ja čsv