Vahkku leat 11 máná ja nuora searvan bargobádjái man Hålogaland Amatørteaterselskap lágidii. Ja oahpaheaddjit leat ieža nuorat ja easkaálgit.
Vegard Bjørsmo (20), Eila Ballovara Varsi (20) ja Mina Letrud (21) leat studeanttat, ja sii buohkat serve buriin mielain go ožžo dán geassebarggu.
Sin buohkaid mielas lea dehálaš movttiidahttit mánáid ja nuoraid lávdedáidagii, go dán suorggis leat unnán fálaldagat, miehtá Norgga.
Dehálaš duostat geahččalit
– Mánnán váillahin dákkár fálaldaga, dadjá Vegard Bjørsmo.
Gávdnui gal kulturskuvla ja maiddái faláštallan, muhto nu go eará smávit báikkiin, de ii lean Kárášjogas valljivuohta fas mii fállojuvvui.
Vegard muitá ahte baleahtta lei «dušše nieiddaide», ja bártnážin son ii háliidan hárddáhallat go liikui dánsumii. Danne searvvai son spábbačiekčamii, doppe gos dat eará bártnážat ledje.
Vegard Bjørsmo lea šaddan dovddusin maŋŋel Stjernekamp-gilvvu, ja son lea sámi jietnaneavttár Disney-filmmas Jikŋon 2.
Dál son lea studeanta, ja oahppá dánsuma ja musikálaneavttašeami. Ja son fertii Osloi fárret, oažžun dihte dán oahpahusa.
- Loga:
Taleanttain váldit vára
– Mu mielas lea hui váivi ahte Vegard fertii fárret eret Sámis, dikšun dihte iežas attáldagaid, dadjá nubbi bagadeaddji Eila Ballovara Varsi. Son lasihastá ahte Vegard han gal álo lea leamaš taleanta, ja ahte dákkár mánáin ja nuorain galggašii váldit vára unnivuođa rájes juo.
Bargobájis lea Eila fuomášan man olu čeahpes nuorat dat gávdnojit. Son sávvá ahte dát nuorat ožžot boahtteáiggis vejolašvuođa gazzat eanet oahpu lávdedáidagis.
– Sámi teáhterat dárbbašit neavttáriid, dánsejeddjiid ja koreográfaid, dadjá Eila.
Ieš lea Eila bargan Beaivváš sámi nášunalateáhteris guokte jagi, ja doppe sus leat leamaš guovddášrollat golmma čájálmasas. Suinna maid oahpásnuvve geahččit HBO-ráiddus Outlier.
- Loga:
Eila diehtá man dehálaš dat lea rekrutteret, ja son sávvá ahte dat nuorat geat oasálaste bargobájis dán vuoru, válljejit lávdedáidaga boahtteáiggis.
– Sámi mánáide ja nuoraide ferte ásahuvvot dáiddalaš fálaldat, ii dušše faláštallan, oaivvilda Eila Ballovara Varsi.
Eadni fertii vuodjit 27 miilla
Oappášguovttos Ella Márge (12) ja Aila Nutti (16) leaba boahtán ruoŧabeal Gárasavvonis dán bargobáji dihte. Eadni dat lea sudnuin vuodján 275 kilomehtera vai nieiddaguovttos beassaba lávlut, dánsut ja neavttašit.
– Njulge oaivvi ja čielggi, bagada Vegard.
Nieiddaguovttos jeagadeaba, ja go luoitiba julggiid láhttái, de boagusteaba.
Soai loaktiba bures, vaikko muhtomin lea sihke lossat ja váttis.
– Lean ožžon ođđa ustibiid dáppe, muitala Ella Márge. Son mieđiha ahte lei sihke balus ja gealdagasas ovdal go joavddai Kárášjohkii, muhto ahte dat ii bistán guhká.
Ella Márge ii diehtán olus maide bagadeddjiid birra, earret dan ahte Vegard lea mielde Disney-filmmas.
Ella Márge ráhkista lávluma, dánsuma ja neavttašeami, ja lea dál fuomášan ahte son loaktá earenoamáš bures neavttašemiin.
– Jus dákkár fálaldagat leat nuppes, de gal eadni ferte dohko muinna vuoddját, dadjá son. Ruovttubáikkis Gárasavvonis lea kulturskuvllas dušše lávlun ja dáidda, ja Ella Márge váillaha neavttašanoahpahusa doppe.
- Ella Márge sámi mánáid-tv:s:
Niehkovahkku
Sámi nuoraid lávdi lea okta dain fálaldagain mainna Hålogaland Amatørteaterselskap (HATS) bargá. HATS galgá nannet ja ovdánahttit revya, teáhtera ja eará lávdedáidagiid.
– Sii geat ruhtadit min barggu leat oaidnán ahte lea dehálaš gávdnat ođđa jienaid sámi teáhteriidda, dadjá prošeaktajođiheaddji Irene Nordhaug Hansen.
Eanet sámi lávdedáidda
Vegard ja Eila muitaleaba ahte soai beanta njuorraseaba go gullaba maid nuorat dadjet bargobáji birra.
– Liggii mu váimmu go soames dajai ahte dá lea leamaš su niehkovahkku, dadjá Vegard.
– Ja de ledje soapmásat geat dadje ahte sii dovde ahte ledje boahtán ruoktot, go besse earáiguin ovttastallat geat maiddái liikojit lávdedáidagii, dadjá Eila.
Čakčat máhccaba ieža oahppodillái. Vegard bargagoahtá bachelorain ja Eila ges álgá jahkeovttadahkii teáhterfágas.
Eilas ja Vegardis lea seammá háliidus boahtteáigái; Bargat sámegielat dáidagiin, go goappašagat dovdaba ahte lea beare unnán lávdedáidda sudno eatnigillii.