Otná koronakárta lea šaddan oalle ruoksat Davviriikkain. Maiddái sámi ássanguovlluin lea dilli mannat vearrát guvlui.
Kárášjoga gielddas lea korona njommon ovcci olbmui. Oktiibuot leat logis isolašuvnnas. Gieldda dearvvasvuođafágalaš ráđđeaddi, Heidi Boine, lohká dili duođalažžan.
– Mii dovdat njoammu fas boahtá ruovttuloahtta. Min gielddas leat dál ovcci olbmos positiivva iskosa ja máŋggas leat ain isolašuvnnas, čilge Boine.
Guovdageainnus maid
Guovdageainnu suohkan dieđihii golggotmánu 13. beaivve, ahte lea ođđa positiiva covid-19 iskkus Guovdageainnus.
Oktiibuot lea viđa olbmos duođaštuvvon covid-19 njoammun dan maŋemus vahkku, čállá Guovdageainnu suohkan neahttasiiddustis.
Vaikko leage stuorra lassáneapmi, de leat Norgga eisseválddit mearridan ahte servodat galgá ain leat rabas.
– Norga lea mearridan ahte min servodat galgá ain leat rabas. Dieđusge rabas servodat addá vára, ahte dávda sáhttá ain leavvat go leat duolut, čilge Guovdageainnu suohkana váldodoavttir Ánne Lájlá Westerfjell Kalstad.
Doavttir ávžžuha buohkaid dál boahkuhit iežaset.
– Mis leat stuorra hástalusat Finnmárkkus go nu unnán olbmot leat boahkohan iežaset. Boahkoheapme lea dat áidna geaidnu olggos dán pandemiijas . Nu álki lea dát ášši, deattuha Kalstad.
Ávžžuhit geavahit njálbmesuoji
Álttás dieđihuvvojedje ikte 13 ođđa njoammuma ja dál leat oktiibuot 57 olbmo isolašuvnnas.
Njoammudili geažil ávžžuhit Guovdageainnu suohkanis ássideaset geavahit njálbmesuoji go galledit Finnmárkku stuorámus gávpoga, čállá Altaposten.
Vássán jándoris leat dieđihuvvon 49 ođđa njoammuma Romssas.
Oppalohkái leat 113 olbmo Romssas erremis covid-19 geažil. Universitehtabuohcceviesus leat dál 20 koronabuohcci.
– Dál eai leat makkárge ovttaskas sivat manne njoammu fáhkka lassána. Eatge dieđe joatká go lassáneapmi, dadjá njoammubajitdoavttir Trond Brattland.
Kárášjogas čuvvot dili dárkilit. Servodat bissu ain rabasin.
– Gieldda bealis mii eat leat bissehan makkárge duoluid, muhto mii ávžžuhat ahte mii eat čoaggan nu ollugat ovtta sadjái, čilge Heidi Boine.