Badjelaš 200 dálá ja ovddeš Anára gieldda ássi gáibidit, ahte Anár gielda geassá iežas cealkámuša sámediggelágas eret riikabeivviid vuođđoláhkaváljagottis.
Anára gieldda cealkámuša mielde buot sámeguovllu ássit galggašedje oažžut seammalágan rivttiid, iige sámiid rivttiid leat dárbu vuhtiiváldit sierra.
Bealiváldima vuolláičállán olbmuid mielas gieldda cealkámuš lea sámiid vuostá iige dat ovddas gieldalaččaid oainnu.
Dál sáhtát ohcat govaid dahje dieđuid vaikkoba iežat soga birra, sámi servodaga, kultuvrra dahje sámehistorjjá birra. Dál lea oainnat rahppon oktasaš sámi digitála vuorkáneahttasiidu «Nuohtti». Doppe buohkat besset ohcat sápmelaččaide gullevaš govaid ja materiálaid gos ihkinassii Eurohpas.
32 vuorkká, girjeráju ja musea miehtá Eurohpa leat buktán materiálaid neahttasiidui, mii lea ovttasbargu Norgga, Ruoŧa ja Suoma Riikkavuorkkáid ja Norgga ja Suoma Sámi vuorkkáid gaskka.
Netflix rávdnjenbálvalusas gávdno dál sámegiel animašuvdnafilbma. Studio Ghibli filmma «Chihiro ilmmiid gaskkas» sáhttá dál geahččat Netflixas sihke davvisámegiel dubbemiin ja tekstemiin. Sámi filbmainstituhtas illudit ja árvalit, ahte boahtteáiggis galggašii šaddat álkit fidnet sámegiel filmmaid dán beakkán rávdnjenbálvalussii. Nu čállá Yle Sápmi.
