– Ledjen justa geargan hivssegis go lihkadišgođii dat stohpu man siste ledjen. Mun fertejin uvssabeallái dollet vai in gahča, muitala Lill Tove Lindi.
Son ja su skibir Patricia Losada leigga fárrolága go eanan doarggistišgođii.
– De mun fuobmajin: Mu skibir, gos son lea! Ja mun viehkalin su ohcat.
Skibir bođii bárggu ovddal.
Suorganan
– Son ii sáhttán vázzit ja lei elektrovnnalaš juvlastuoluin jođus. Fertejin jeđđet su, ahte ii gálgga čierrut, moai letne jođus olggos dál, muitala Lindi.
Go beasaiga olggos dan vistis gos leigga de vikkai Kárášjohkalaš riŋget eadnái ja irgái, muhto ii beassan čađa go telefonlinnját eai doaibman.
– De mus gal gieđat doarggistedje, dadjá Lindi gii lei duođaid suorganan.
Muhto sudnon manai lihkos bures.
225 olbmo duššan
Eanandoarggástus Mexicos lea garraseamos mii leamaš 32 jahkái. Maŋŋebárgga mihtiduvvui eanandoarggástus 7,1 Richters ceahkkálas.
Dássái leat 27 viesu gahčan čoahkkái, ja 225 olbmo duššan. Eiseválddit leat ain ohcamin olbmuid viessubázahusain.