Normal

Varresvuodabargge oahppi sámegielav

Dálla galggi viehkkesujtára vuorrasijsijdan, Divtasvuonan buorebut guládallat sámegielak vuoras ulmutjij gudi vuorrasijsijdan årru.

Sametingspresident Aili Keskitalo

Vuorkkágåvvå: Sámedikke presidænnta Aili Keskitalo guossijdij vuorrasijsijdav Gásluovtan guovvamáno dán jage. Dála l sån ságastime vuorasulmutjij vuorrasijsijdan.

Foto: Sander Andersen / NRK

Arnhild Lindbach

Divtasvuona suohkana sámegiela åvddånahtte, Arnhild Lindbach.

Foto: Harrieth Aira / NRK

– Mij lip dán máno álggám sámegielåhpadimijn viehkkesujtárijda Gásluovtan.

Dav subtsas Divtasvuona suohkana, sámegiela åvddånahtte Arnhild Lindbach.

– Gávkalussji gå e oattjo sámástit

Maŋemus jagijt la Divtasvuona suohkan tsuojggiduvvam gå nav binná barggijs vuorrasij sijdan sámegielav dádjadi ja máhtti. Sierraláhkáj li dáj vuoras sámij lagámusá dáv dilev tsuojggim.

– Mån sælldát hådjånav gå vuoras sáme e oattjo sáme gullat jalik sáhkadit, ja mån jáhkáv aktuvuohta dåbddu vil værábut gå e goassak oattjo ietjasa gielav gullat, javlaj akta lagámusájs Anne Kalstad Mikkelsen NRK:j snjuktjamáno dán jage.

Ja árabut dán jage tsuojggij sámedikke presidænnta Aili Keskitalo gå Divtasvuona suohkan lij válljim guovtegielalasj rudájt foanndaj biedjat.

Rudájt majt Sámedigge Divtasvuona suohkanij juohkka jage juollot guovtegiela bargguj.

Dat aj suhttadahtij bájke ulmutjijt.

Sámedikke presidænnta dalloj javlaj sujna li vuorddemusá dát dåssju akti dáhpáduvvá, ja sávaj juo boahtte jage Divtasvuonan giellabarggo åvddån.

Helsearbeidere på samiskkurs

Varresvuodabargge sámegiela kursan. Gåro bieles Virva Holm, Anita Solstrøm, Eleanore N Westermann, Grete Hanssen, Annika Selin.

Foto: Tysfjord kommune

Sij sjaddi oahppat ájnnasamos gárgadisájt majt dárbahi ietjasa bargon, duola dagu gatjádit “sidá gus tjátjev?”

Arnhild Lindbach

– Guládallam ájnas

Arnhild Lindbach javllá guládallam la ájnas. Ja dan diehti álggám li varresvuodabargge vuorrasijsijdan sámegielakurssaj dán tjavtja.

Lindbach ij dal jáhke suohkana varresvuodabargge dåssju dájna ájnna kursajn galggi máhttet ålleslattjat vuorasjulmutjij sámegielajn guládallat.

Valla sån doajvvu bargge galggi vehi gåjt máhttet ságastit vuoras sámij.

– E dal dåssju dájna kursajn åhpa ålles sámegielav. Valla sij sjaddi oahppat ájnnasamos gárgadisájt majt dárbahi ietjasa bargon, duola dagu gatjádit “sidá gus tjátjev?” vaj máhtti vuorasulmutjijt buorebut sujttit gå dav majt udnatji li máhttám, javllá Lindbach.