Dása eai liiko mánáidgárddi vánhemat ja fágasearvi.
– Ii astta čoavdit mánáidgárddi áššiid
Vánhen jođiheaddji Goržži mánáidgárddis, Olmmáivákkis Ingvild Larsena mielas ii leat buorre go skuvlla rektor jođiha mánáidgárddi go son ii astta čoavdit mánáidgárddi áššiid doarvái bures, go ii leat čađat doppe.
Sihke Olmmáivákkis ja Biertaváris jođiha skuvlla rektor maid báikki mánáidgárddi. Dálošvákkis, suohkana hálddahusbáikkis gal lea sierra mánáidgárddi jođiheaddji.
– Ii galggašii jođihit guokte bargosaji
Olmmáivákkis lea rektor jođihan Goržži mánáidgárddi fargga guokte jagi.
Gáivuona oahppolihttu jođiheaddji Bodil Salo mielas ii leat buorre čoavddus, go dát čuohcá sihke skuvlla jođiheapmái ja mánáidgárddi pedagogalaš dillái go rektor galgá jođihit dán guovtti bargosaji.
– Berre heaittihuvvot
Dát ortnet lea galgan evaluerejuvvot muhto ii leat dahkkon. Biertaváris lea ortnet bisttán meastá golbma jagi. Gáivuona oahppolihttu jođiheaddji, Bodil Salo oaivvilda ahte ortnet berre heaittihit jođáneamos lági miel.