NRK Meny
Normal

Válgabiirelisttain boasttuvuođat

Sámedikki golmma válgabiire listtain lea vuoruhanvejolašvuohta gártan boastut. Ávjováris guoská boasttuvuohta buohkaide geat leat guđat, čihččet ja gávccát sajis listtain, go sin ii leat vejolaš kumuleret.

Válgabiirelisttain boasttuvuođat
Foto: Torgeir Varsi / NRK

Sámedikki ráđđeaddi Tove Anti

Sámedikki ráđđeaddi Tove Anti muitala ahte leat sádden gielddaide divvojuvvon válgabiirelisttaid.

Foto: Torgeir Varsi / NRK

Sámediggi fuomášii mannan vahkus ahte golmma válgabiire listtain ii leat riekta kumuleren- dahje vuoruhanvejolašvuohta, muitala Sámedikki ráđđeaddi Tove Anti.

–Jienastuslihpuin maid mii leat sádden, lea vuoruhanvejolašvuođa lohku boastut. Ávjovári válgabiirres mas livččii galgan leat gávcci vuoruhanvejolašvuođa, leat dál dušše vihtta, dadjá Anti.

Jienasteapmi álgán

Sámediggeválggaid ovddalgihtiijienasteapmi álgán

Guovdageainnu suohkkana giellabargi Maia Hætta dadjá ahte sii fertejit čilget jienasteddjiide mii listtain lea boastut.

Foto: Jenna Rasmus / NRK

Duorastaga álggii Sámediggeválggaid ovddalgihtiijienasteapmi ja gielddat lágidit jienasteami. Guovdageainnu suohkana giellabargi Maia Hætta dadjá ahte sii fertejit čilget boasttuvuođa olbmuide dassážii ožžot ođđa listtaid.

-Dat váldá veahá eambbo áiggi ja dieđusge jus bohtet ollugat dáid beivviid, dassážii go mii leat fitnen daid rievttes listtaid, de soaitá šaddat veahá vuordináigi.

Duhtameahttun diliin

Bargiidbellodaga Jan Gunnar Johansen lea čihččet sajis Ávjovári válgabiirelisttain. Su mielas sáhttá vahágin, go ii sáhte sirdot boasttuvuođa geažil.

–Dat gal lea dieđusge suddu jus diekkár vahát boahtá. Olbmot háliidit jienastuvvot Sámediggái ja soitet manahit dan vejolašvuođa maid muđui livččet ožžon, eaige jienasteaddjit oaččo dohko dan olbmo gean háliidit, dadjá Johansen.

Jan Gunnar Johansen

Jan Gunnar Johansena mielas sáhttá vahágin go válgabiire listtain lea vuoruhanvejolašvuohta gártan boastut.

Foto: Dan Robert Larsen / NRK

Juohke válgabiiremandáhttalohku dat mearrida gallása lea vejolaš vuoruhit eará láhkai. Ávjováris leat gávcci mandáhta, go fas Davviguovllus ja Lulli-Norggas guhtta. Dan dihtii dáid válgabiirriid listtain leat dál boasttuvuođat, go vuoruhanvejolašvuođat eai leat nu olu.

Dan dihtii lea Sámediggi dál sádden ođđasit listtaid gielddaide ja njulgejit ášši vuossárgii.

–Jus olbmot jienastit, geavahit daid boares válgalihpuid, de ii hilgojuvvo dat jietna dat lihkká lohkkojuvvo, čilge Sámedikki ráđđeaddi Tove Anti.