Vaikke joatkkaskuvlaoahppu lea fylkkagieldda ovddasvástádus, de ii leat 15-16 jahkásaččaid orrundilli sin ovddasvástádus lága miel. Ja nu ii leat ge huksen, oaivvilda Finnmárkku fylkkagielda. Sii baicca árvalit eará čovdosiid.
– Mii áiggošeimmet ásahit ovddasbarggu Álttá suohkaniin ja priváhta fitnodagaiguin geat sáhtaše hukset visttiid várrejuvvon ohppiide. Mii baicca sáhtašeimmet láigohit visttiid dahje juolludit muhtin supmi jahkái dán doibmii nu mo leat dahkan Porsáŋggus, dadjá Finnmárkku fylkkagieldda várresátnejođiheaddji Bente Haug NRK:ii.
Dušše 100 láigolanja
Álttá joatkkaskuvla lea Finnmárkku stuorimus joatkkaskuvla mas leat badjelaš 1000 oahppi. Dáin duháhis leat 300 eret eará gielddain ja gilvalit čuođi láigolanjas várrejuvvon joatkkaskuvllaohppiide.
Romssa Universitehta studeanttaid ovddastus (Samskipnaden dárogillii) láigohii diibmá 64 viessolánjaid fylkagildii maid joatkkaskuvllaoahppit besse láigohit. Dáid viessolánjaid eai šat láigot fylkkagildii dán jagi go universitehta Álttá-studeanttat dárbbašit daid ieža.
Studeanttaidsearvvi jođiheaddji Marianne Haukland lea ovdal cealkán NRK:ii ahte orrundilli maid čuohcá skuvlavázzima ja ahte son ballá ahte ollugat heitet skuvllas dan dihte.
Ođđa čoahkkin
Finnmárkku fylkkagielda lea árvalan ahte stáda, studeanttaid ovddastusa bokte, váldá badjelasas ovddasvástádusa hukset ja doaimmahit láigolanjaid ohppiide, muhto departemeantta ii leat dása miehtan.
Áltá sátnejođiheaddji Laila Davidsen sávvá ahte sii oktan fylkkagielddan gávdnet čovdosa vai oahppit geat dál álget skuvlii Álttás, lea orrunsadji. Borgemánu 18. beaivve lea sis fas čoahkkin.
– Dalle mii fertet gávnnahit mo mii buoremusat nagodat oaččut priváhta fitnodagaid huksegoahtit eambbo dákkár orrunsajiid ja mo mii suohkana bealis sáhttit dása láhččit dili, dadjá Laila Davidsen.