NRK Meny
Normal

Váidet luossašiehtadusa politiijaide

Geassemánus Norgga-Suoma kommišuvdna árvalii Deanočázádahkii ođđa bivdonjuolggadusaid. Dát árvalus vealaha guovllu sápmelaččaid, oaivvildit njeallje guolástangotti Ohcejogas ja Ohcejoga gielda. Dál áigot váidit ášši politiijaide.

Geassemánus Norgga Suoma kommišuvdna árvalii Deanocázádahkii odda bivdonjuolggadusaid. Dát árvalus vealaha guovllu sápmelaccaid, oaivvildit njealje guolástangotti Ohcejogas ja Ohcejoga gielda, ja áigot váidit ášši politiijaide.

Reportar: Nils Henrik Måsø, govven ja čuohppan: Harry Johansen. Govas: Antti Kateeketta, Mika Aikio, Ilmari Tapiola, Tiina Sanila Ailio, gielddahoavda Vuokko Tieva-Niittyvuopio, Samuel Paltto, Nilo Aikio ja Esko Aikio

– Lea buorre ahte dat váidet politiijaide. Dat leat vuojeheamen veagal min eret, ja turisttaide dat addet eambbo lobiid. Min dat bidjet gáddái, lohká luossabivdi Báđoš Rávdná, Rávdná Guttorm, gii eallinagi lea bivdán luosa Deanus firpmiiguin.

Báđoš Rávdná, Ravdna Guttorm

Báđoš Rávdná, Ravdna Guttorm

Foto: Nils Henrik Måsø/NRK

– Šiehtadusas oidno rasisma

Ohcejoga guolástangottit ja Ohcejoga gielda dat leat oktasaš čoahkkimis mearridan váidit politiijaide Suoma ámmátolbmuid, geat leat jođihan Deanočázádaga ođđa bivdonjuolggadusšiehtadallamiid.

– Dan šiehtadusas oidno maid čađa rasisma, dan láhkai ahte daidda Suoma beal bartaeaiggádiidda addojit vuoigatvuođat mat eai sidjiide gula, ja sápmelaččain fas váldojuvvojit eret dat vuoigatvuođat.

Nu lohká Ohcejoga gielddaráđđehusa sátnejođiheaddji Ilmari Tapiola ja muitala ahte go sii leat leamaš oktasaš čoahkkimiin, de maiddái dat báikkálaš olbmot leat bálkestuvvon eret čoahkkimiin.

Ámmátolbmot geaid árvvoštallet váidit politiijaide, eai hálit kommenteret ášši ovdal go leat oaidnán váidaga sisdoalu.

– Norgga beal galggaše maid guorahallat

Šiehtadusárvalusa vuođul Deanoleagi árbevirolaš fierbmebivdu galgá gáržžiduvvot 40 beivviin. Seammás Suoma beale bartaeaiggádat eai rehkenastojuvvo leat šat turistan nu movt dássážii, muhto ožžot seamma bivdovuoigatvuođaid go báikki stággobivdiin leat.

Dat mearrádus vealaha guovllu sápmelaččaid, oaivvildit Ohcejoga guolástangottit ja Ohcejoga gielda.

– Dat lea nu duolbmamin dál min sápmelaččaid, buot earáge áššiinge, muhto dát gal lei vel dat loahppa, oaivvilda Báđoš Rávdná, Rávdná Guttorm

Tiina Sanila Aikio

Suoma sámediggepresideanta Tiina Sanila Aikio

Foto: Nils Henrik Måsø/NRK

Maiddái Suoma sámediggepresideanta oasálasttii dán oktasaš čoahkkimis.

– Norgga Sámedikkis sáhtáše maid iežaset bealis guorahallat ahte leat go seamma sullasaš meannudanfeaillat dáhpáhuvvan Norgga bealde, ja jus leat, de mo daidda reageret, ávžžuha Suoma sámediggepresideanta Tiina Sanila Aikio.

.