– Mánáide lea váivvit ja unohasabut vásihit veagalváldima go ollesolbmuide lea váidit dan, dadjá Lene Sivertsen Inseasta ja seksuála veagalváldimiid guovddážis. Son lea guhte váidá searvvi politiijaide.
Go 11 olbmo muitaledje iežaset veagalváldima birra Divttasvuona suohkanis, leat ollusat imaštallan movt dat sáhtii geavvat ja manne lea beassan bistit ná guhká nu ahte ii oktage leat reageren.
VG-aviisa lea gullan oktiibuot 47 historjjá main sihke nissonat ja dievddut galget leat veagalváldon.
Rihkkon lága
Lestadiána searvegoddi lea ožžon olu moaitagiid maŋŋel go dát áššit almmuhuvvoje, earret eará lea mánáid- ja dásseárvoministtar Solveig Horne cuiggodan searvegotti oaivila ahte ii leat sin ovddasvástádus váidit veagalváldimiid.
Lene Sivertsen lohká ahte go searvegoddi addá dákkár cealkámuša, de leat dovddasteamen rihkkon heađuštanlága, ja dan dihte leage váidán lestadiána searvegotti politiijaide
Henning Einvik ovddasta Divttasvuona lestadiána searvegotti.
Foto: Øyvind A. Olsen / Avisa Nordland.
– Láhka geatnegahttá buohkaid dieđihit vearredaguid mat leat dahkkon dahje sáhttet dahkkot. Lea duođalaš ja ráŋggáštahtti, jus searvi ii leat dieđihan.
– Luohttá politiijaide
Henning Eivik gii ovddasta Divttasvuona lestadiána searvegotti kommentere oanehaččat ahte sii luhttet politiijaide ja maiddái váldet vuhtii váidaga, ja son ii hálit dađi eambbo kommenteret ášši.
NRK lea ožžon duođaštusa Nordlándda politiijaguovllus ahte searvegoddi lea váidon ja ahte ášši lea oassin dan ollislaš dutkamis.
