Finnmárkku filkkagielda lágidii dán vahkku kultur-, ealáhus- ja johtolat-seminára Kárášjogas. Dán semináras digáštalle earret eará movt galggaše nagodit ollášuhttit filkkagieldda mihtu ahte ásahit 500 ođđa kultur-bargosaji. Ja dán oktavuođas dat almmuhii ge SG-politihkár Johan Mathis Gaup ahte vuolidit dáiddáriid ja eará kulturbargiid vearu.
-Svalbardas vuolidedje dáiddáriid vearu 20 jagi áigi, juste danne vai galggaše oažžut eanet dáiddáriid ja kulturbargiid boahtit dohko ja bargat. Ja vásáhus lei ahte nannáma dáiddárat vulge Svalbardai bargat oanehit áigái, ja nu nannejuvvui kultuvrralaš eallin maiddái doppe, muitala Gaup.
Bissehit fárrema
Johan Mathis Gaup dadjá ahte go son dán evttohii Finnmárkku filkkagieldda kultur-, ealáhus- ja johtolatsemináras Kárášjogas, de vuostáiváldui dát evttohus sihke bohkosiiguin ja mojiiguin. Muhto máŋggas ledje suinna ovtta oaivilis ahte dá sáhtášii buorre vuohki movt geasuhit kulturbargiid Finnmárkui.
-Go mii vásihit ahte maiddái iešguđetlágan surggiid kulturbargit fárrejit danne go Finnmárkkus eai leat sidjiide bargosajit, dadjá Gaup. -Jus olggobeale kulturbargiin livččii unnit vearru go earáin, de livččii dat geasuhan bargiid juobe oanehit áigái ge Finnmárkui. Nu sáhtáše guovllu dáiddárat diinet omd. jus láigohit olggobeal dáiddáriidda visttiid jna., dadjá Gaup.
Guovdageainnu Sosiálistalaš Gurutbellodat dat lea ovddidan dán evttohusa ja áigu geahččalit ovddidit evttohusa maiddái ráđđehus-dássái.
