Unnan ságastallon áhčigiela birra

Girjjis čuovvut Alma nieiddažin gittá dassái šattái rávisolmmožin, sihke buorit ja váivves vásahusaid bokte.

Mánnávuohta

Girječálli, Gerd Mikalsen lea válljen muitalit romána dáhpahusaid Olmmáivákkis. "Áhčigiella" lea dárogiella, mii lea dego láhka, mearrideaddji giella lohká Mikalsen. Váldoolmmoš girjjis, Alma vásihii ahte ruovttus ii galgan sámástit, ja erenoamaš su áhčči deattuhii dan ahte dušše dárogiella galggái gullot sin viesus. Eadni gal lávii sámástit go boazosámit bohte guossái. Áhčči gal dárustii ruovttus vaikko gii finái guossis.

Girječálli muitala vuđđolaččat mo Alma dilli go vuođđoskuvlii alggii, ciealahuvvui ja ahte Alma ii loktán skuvlavázzimis ovdal sirdojuvvui B-luohkkái. Dalle dovddái easka iežas oaddjebassan. Mánnávuođas lei maid dan aiggi lunddolaš fitnat rohkosin, ja doppe ii lean buot mii lei Alma mielas nu suohtas.

Ollesolmmožin bođii diehtit ahte áhčči han sámásta

Girječálli muitala dáhpahusa birra go Alma lei áhčiinis mielde golmmá riika rádjái čuoigga. Guokte máttánorgalačča ledje sin fárus, go áhčči muitala sidjiide ahte son máhttá sámegiela. Dát dieđosge suorggahii Alma garrasit. Dát dáhpahus čuovui guhká Alma eallimis viidaset.

Girječálli čájeha ollesaiggi ahte Alma ja áhči oktavuohta ii lean nu buorre, mii vuhto čađat dáhpahusain.

Čalmmusdahtta mearrasámiid gielladili

Girječálli čalmmustuhta maid mearrasámiid dili dan aiggi go ovttastalle siseatnan sámiiguin, erenoamaš giela dáfus. Mearrasámi nuorat eai duostá sámástit siseatnan sápmelaččaiguin go balle ahte eai máhte doarvái bures. Dán sáhttá buhtastahttit otná beaivái maid, lohká Mikalsen.

Girji lea čállon dárogillii go girječálli ii máhte sámegiela čállit. Girji jorgaluvvo maid sámegillii, ja Mikalsen jáhkká ahte dát girji heive buohkaide. Boahtte distaga lea almmolaš girjealmmuheapmi Romssagávpogis, ja Mikalsen lohká ahte lea veahá balus go son han ii leat goassege ovdal leamaš dakkár olmmoš gii galgá guovddážis.

Gulá Gerd Mikalsen muitaleamin "Áhčigiela" birra: