NRK Meny
Normal

Unnán beroštupmi sámi diliide

Suohkanat lullisámi guovllus eai vuorut dearvvašvuođabargiid oahpásnuvvat sámi diliide, oaivvilda semináralágideaddji.

Sykehus
Foto: Francois Destoc / PHOTOPQR/LE TELEGRAMME

Dearvvašvuođabargit lullisámis galggaše maid beassat oahpásnuvvat sámi geavaheddjiid dillái.

Dán oaivvilda lullisámi dearvvašvuođabargiid fierpmádat.

Muhto suohkaniin lullisámi guovllus lea unnán beroštupmi searvat dákkár seminárii.

Inger Máret Eira-Åhren lea okta seminára lágideddjiin.

GULDAL: Lullisámi dearvvašvuođaseminára

Seminára lea jahkásaš dáhpáhus man ulbmil lea ovddemusat oahpahit dearvvašvuođa ja sosiála bargiid geat bálvalit lullisámiid.

Dán jagi lea fáddán earret eará boazodolliid psyhkalaš dearvvašvuohta. Olu boazodolliin lea lossa dilli go sin ealáhus lea áitojuvvon ja dávjá riiddu gaskaoapmi, ja dán galggašege dearvvašvuođabálvalusas máhttit dustet.

Muhto Eira-Åhren lohká váttisin oažžut suohkaniid ipmirdit ahte dát gullá maiddái sidjiide.