Barget nuvttá
Searvvi miellahttut leat ovttasráđiid divodeamen dálu maid leat oasttán. Moadde jagi leat gal ruđaid viggan háhkat máŋgga lahkai, sihke básáriid ja eará doaluid oktavuođas. Ruhtadoarjagiid maid leat ohcan sihke fylkkas ja Sámedikkis, nu muitala Unjárgga penšunisttasearvvi jođiheaddji Nils Einar Mathisen.
Olu leat juo gárvvistan
Sii leat gárvvistan váldolanja, lanja gos čoahkkimiid dollet ja maiddái láigohit earáide sin doaluide. Dál áiggošedje stuoridit hivssega ja gievkkana. De olu lea ain bargu ovdal go buot lea gárvvis. Goit váldolatnja dánsenláhtiin lea gárvvis, ja searvvi jođiheaddji Nils einar Mathisen lohká dás leat juo vejolaš dánsestit.
Vuorddašit doarjagiid
Dál vuorddašit vástádusa Sámedikkis, go Sámedikkis leat sii ohcan doarjaga iežaset doibmii. Ja jos doarjagiid oččošedje, na de livččii vejolaš geavahišgoahtit olles dálu. Nuvttá sii barget gal, muhto ruhta fertešii mainna ávnasiid oasttá.
Dállu geaidnoguoras
Unjárgga penšunisttaid dállui álki beassat, erenoamážit dálvit, go dállu lea áibba geaidno guoras Unjárgga girkobáikkis. Dán dállui besset bures juolggeheamit ja juvlastuollogeavaheaddjit. Lagabui geainnu iiba beasašiige.