Ubmisámegiela čállinvuohki lea dohkkehuvvon odne virggálaččat ávvodoaluin Margareta girkus Boaresbáikkis, Livššus - ubmisámegiela ođđa čállinvuogi mielde Båriessbájkkien, Lïksjuon.
Vuolláičálle loahppadokumeantta
Ávvodoaluid lágidit Álgguogåhtie-ubmisámesearvi, Lïksjuon sámien seäbrrien ja Lïksjuon kommuvdna. Sámi Giellagáldu-joatkkaprošeavtta prošeaktahoavda, Marko Marjomaa, rabai ávvodoaluid odne dii 14, ovdanbuvttii Sámi Giellagáldu ubmisámegiela bargolávdegotti lahtuid ja bovdii lávdegotti loahppadokumeantta vuolláičállimii.
Sámi Giellagáldu ubmisámegiela bargolávdegoddi vuolláičálii ávvodoaluin badjelaš 20 siidosaš loahppadokumeantta, mii govvida ubmisámegiela čállinvuogi iešvuođaid.
Lea leamaš guhkes ja mohkkás bargu joavdat dán muddui, ja okta gii lea vuordán dán beaivvi lea ubmisámegiela oahpaheaddji Sara Helèn Persson.
– Lean guhká bargan ubmisámegielain, ja dát lea máilmmi stuorá lávki. Guhká lean vuostebiekkas bargan, muhto dal dovddan ahte biekkat leat jorggiheame, lohká Persson
.Ávvodoalut
Álggugåhtie ubmisámesearvvi ságadoalli Ulla Barruk-Sunna hupmá ávvodoaluin čállinvuogi mearkkašumi birra ubmisámegielagiidda. Muđui lea ávvodoaluin maid guoimmuheapmi ja gáfestallan.
– Máŋgasat leat rahčan dán ovddas, ja máŋgasat háliidit oahppat ubmisámegiela. Boahtteáigi gal lea čuovgat, lohká Sara-Helén Persson SR Sámeradioi.
Bargolávdegottis leat njeallje áššedovdi: Henrik Barruk ja Emeritus professor Olavi Korhonen, geat leaba álgoálggus ráhkadan ubmisámegiela čállinvuogi. Soai ovddasteaba Ruoŧa Sámedikki. Norgga Sámedikkiges ovddasteaba Emeritus professor Pekka Sammallahti ja professor Ole-Henrik Magga.