– Mu beassážat gal ledje nu ahte in beassan eará go aitto olggobeallái stobu. Geaidnu lei gitta stobu lusa, váldogeainnus munno geahčai, muitala Biret Inga Bær Andreassen.
Son orru Máhkarávjjus. Garra uđasvára geažil lea geaidnu stobu lusa leamaš gitta vahku. Áidna vejolašvuohta lei vázzit meattá uđasguovllu jos áiggui gosage.
Bær Andreassen ii leat makkárge hearkkes nissoniid.
ISOLEREJUVVUI: Biret Inga Bær Andreassen beasai maŋŋebárgga viimmat galledit skihpáriid.
Foto: Privat– Mun in lean balus eará go mun ja isit šattaime vázzit meattá dan skálvvi mii heaŋgá bajábealde geainnu.
– Dat lei hui issoras vázzit dan meattá, go olmmoš ii dieđe goas dat luovvana. Jus de fáhkkestaga lea olmmoš dakko vulobealde. Dat ii lean somá dan birra jurddašit, dadjá son.
Lea leamaš erenoamáš dilli
Dan botta go Sis-Finnmárkkus lei fiertu ja čáppa beassášdálki, de lei stuorra oassi Finnmárkku rittus gitta. Eanemusat ledje badjel 30 geainnu giddejuvvon uđasvára dihtii.
Bær Andreassen ii leat ovdal vásihan ná ollu muohttaga Máhkarávjjus.
– Dáppe letne orron 11 jagi ja maiddái lean ovdal orron Máhkarávjjus. Mii diehtit gos mii orrut. Muhto ná vearrái mo dát dálvi lea leamaš in leat ovdal vásihan. Mun gal lean jo áibbas dolkan dán dálvái, šuohkiha son.
– ERENOAMÁŠ: Finnmárkku Johtolat váldolávdegotti jođiheaddji Geir Ove Bakken dadjá dát leat leamaš erenoamáš beassážat.
Foto: Finnmark fylkeskommune / FFKFinnmárkku Johtolat váldolávdegotti jođiheaddji Geir Ove Bakken dadjá ahte olbmot Finnmárkkus leat leamaš várrugasat.
– Dilli lea leamaš erenoamáš. Ollu geainnut leat leamaš gitta, ja dát beassážat šadde áibbas earáláganin hui ollu olbmuide go eai leat beassan guođđit ruovttuid. Dat mii lea buorre lea go eai leat dáhpáhuvvan stuorra lihkohisvuođat ja olbmot leat veahkehan guđet guimmiideaset, dadjá Bakken.
Ain uđasvárra Davvi Norggas
Váikko Finnmárkkus ii leat oktage duššan uđđasiin, de leaba guovttes duššan sihke Davvi Tromssas ja Davvi Nordlánddas.
Ain lea uđasvárra 3 (nubbin alimus várra) Oarje-Finnmárkkus, gitta Sáltoduoddara máttabeallai. Dan dieđiha varsom.no, mii čuovvu earret eará uđasvára Norggas.
Stáhta geaidnodoaimmahat dieđiha ahte ain leat 23 geainnu gitta dahje gos ferte ráiddus vuodjit Davvi Norggas.
Beasai otne vuodjit
Maŋŋebárgga maŋŋá beassážiid rahppui geaidnu Biret Inga Bær Andreassen stohpui:
– Viimmat lean beassan biilii čohkkedit, gávppašit ja skihpáriid galledit!
Muhto Bær Andreassen ii vuolgge guovlluide gos ain lea uđasvárra. Geaidnu lei gitta njukčamánu 21. beaivvis cuoŋománu 3. beaivái.
