NRK Meny
Normal

Vuovdán meastta visot sámi leavggaid ovdal álbmotbeaivve

Maritex Gávpi Guovdageainnus lea olu jagiid vuovdán sámi leavggaid ja sámi 100 jagi ávvudeame olis mannan jagi lassánii beroštupmi sámi levgii.

Barnekor synger under åpningsseremonien for Tråante 2017

Tråante doalut mannan jagi dahkká ahte eambbo olbmot dál osttet sámi leavgga, oaivvilda buvdaeaiggát.

Foto: Tor-Emil Schanche / NRK

– Sámi álbmotbeaivi lea dat áigi goas buohkat dáhttot sámeleavgga, ja jagis jahkái lassánit diŋgojumit, lohká Maritex Gávppi jođiheaddji Inger Marit Bongo. Skuvllat, almmolaš ásahusat ja dál maid olu priváhta olbmot diŋgojit gávppis sámi leavgga.

Miehtá riikka

Oslo Flaggfabrikk maid vuovdá hui olu sámi leavggaid, erenoamážit daid vahkuid ovdal sámi álbmotbeaivvi. Maiddái sidjiide lei mannan jahki veaháš erenoamáš go dákkár ávvojagi ledje eambbo diŋgojumit go muđui lávejit leat.

Ellen Vanem, Oslo Flaggfabrikk

Oslo Flaggfabrikk hálddahuslaš direktevra Ellen Vanem lohká sámeleavgga divrasat go dat gáibida eambbo barggu goarrut dan.

Foto: Hilde Erlingsen / NRK

– Skuvllat, gielddat ja almmolaš ásahusat, doppe dat bohtet eanaš diŋgojumit, muhto sáhttet maid diŋgojumit jos leat ávvudeamit, lohká Oslo Flaggfabrikk hálddahuslaš direktevra Ellen Vanem.

Go sámit ásset njealja riikkas, de sáhttá Suomas, Ruoŧas, Ruoššas dahje Norggas gávdnat buriid sámi leavgafálaldagaid, nu go neahtas.

Eai stuorra leavggaid

Maritex Gávppis lohket vuovdit maid stuorra leavggaid, maiguin olgun levge. Muhto nu gohčoduvvon balkoŋŋaleavggat, man mihtut leat 75X100 cm, leat dan sturrodagas maid hui olu olbmot ostet.

– Mii leat measta visot dieid leavggaid vuovdán ja leat šaddan eambbo daid diŋgot, lohká Inger Marit Bongo, ja levgen gal ieš maid sámeleavggain, muhto nu go olu eará sápmelaččain de ii leat gal mus leavgastággu ja nu lea mis dušše diet balkoŋŋaleavga.

Maiddái Oslo Flaggfabrikk lohká unnit leavggain buoret jođu ja jáhkket olbmuid daid dáhttut go sámi álbmotbeaivvedoalut leat dálvet ja dalle dávjjimusat levgejuvvo siste.

– Mii vuovdit jahkásaččat beannot čuođi sámi leavgga. Mannan jahki gal lei erenoamáš ávvojahki ja diŋgojumit ledje de olu, lohká Oslo Flaggfabrikk hálddahuslaš direktevra Ellen Vanem.

Divrasat leavga

Facebookas čállá sámi servvodatberošteaddji Audun Lona, gii ássá Oslos, ahte son lea iskan sámeleavgahattiid Oslos. Jos lei galgat oastit sámi leavgga, de dat mávssii olles 500 kruvnna eambbo go Norgga leavga seamma sturrodagas. Ollugat leat kommenteren su čállosa ja čállet sámi leavgga leat várra divrasat go eai gorro dahje buvttaduvvo nu olu sámi leavggat.

Inger Marit Bongo

Maritex Gávppi jođiheaddji Inger Marit Bongo lohká sámeleavgga jođihan bures maŋimus jagiid.

Foto: Kjell Are Guttorm / NRK

– Olbmot lohket sámi leavgga divrasat go Norgga leavgga, muhto in oro vuohttimin ahte dat livččii hehttehussan gal gávppašeddjiide. Mis han lea sturron leavgajohtu, lohká Bongo.

Oslo Flaggfabrikk váldá maid eambbo mávssu sámeleavggas go Norgga leavggas, vaikko leat seamma sturrodagas.

– Sámi leavga lea divrasat go dat lea veahá erenoamáš, nu šaddá eambbo bargu juohke leavggain, lohká Ellen Vanem.