– Digitaliserenministtarin lea somá boahtit deike Guovdageidnui ja oaidnit dákkár allateknologalaš fitnodaga, mas olles máilbmi lea márkanin. Soai geavaheaba skábma- ja buolašáiggi hutkat reaiddu, mii lea ávkin sihke boazodollui ja muđui guođohanealáhusaide miehtá máilmmi.
Nu lohká Hofstad Helleland NRK Sápmái.
Ministtar finadii ikte Guovdageainnus. Son lei mielde smávva ealáhusságastallamis. Dasto galledii fitnodagaid.
Hofstad Helleland muitalii maid ođđa stuorradiggedieđáhusas «Sámi giella, kultuvra og servodateallin - Ealáhusvuođđu ealli sámi báikegottiide».
Dieđáhusa mihttomearri livččii oččodit olbmuid fárret fas ruovttoluotta ruoktot maŋŋá go leat geargan oahpu gazzamis. Stuorradiggedieđáhus almmuhuvvui mánotbaji áigi.
Alla oahpu gazzat, boahtit ruoktot ja ásahit fitnodaga
Sámi ássanguovlluin lea olmmošlogu njiedjan duođalaš ášši. Maŋimuš guovtti jagis leat 7700 olbmo fárren eret Davvi-Norggas.
Dát veadjá leat okta stuorámus áitagiin sámi gillii, kultuvrii ja eallinvuohkái, nu boahtá ovdan stuorradiggedieđáhusas.
Tor Erik Somby ja Tim Valio leaba ovttas ásahan Tundra Drone fitnodaga.
– Munno fitnodatjurdda lea hutkat ja ráhkadit lassirusttegiid dronaide, čilge Somby.
Sombys lea master márkanfievrrideamis ja lea čađahan Globála innovašuvdnaprográmma Stanford universitehtas USA:s. Valios lea master elektronalaš inšenevran.
– Dá lea justa dat maid mii máinnašat iežamet strategiijain, ahte iešguđet oassi Norggas galgá váldit atnui dan gilvvohallanovdamuni mii sis lea iežaset guovllus. Dáinna sáhttet ásahit fitnodagaid ja bargosajiid. Dainna šaddet nannosat báikegottit, čilge Hofstad Helleland.
– Teknologiija addá vejolašvuođaid
Tim Valio dat lea fitnodaga teknologalaš hutki.
Son lohká, ahte smávva báikkiin nugo Guovdageainnus lea visot mii gáibiduvvo teknologalaš fitnodaga ásaheapmái.
– Dáppe lea johtilis interneahtta, heivvolaš bargolanjat ja viiddis guovllut gos sáhtte geahččaladdat iežame ideaid, čilge Valio.
Dán birra máinnašuvvo maiddái stuorradiggedieđáhusas: «Johtilis ja stáđis mobiila- ja govdabáddefierpmádat lea vuođđoinfrastruktuvra ássiide ja ealáhuseallimii. Maiddái lea dehálaš eaktu geahpedit goazaheaddji beliid, nu mo guhkes gaskkaid ja bieđgguid ássama.»
– Vuođđoealáhusain nu mo boazodoalus, eanandoalus, guolástusas ja meahcásteamis, lea ain guovddáš sadji sámi servodagain. Mii fertet almmatge jurddašit viidábut. Sámi servodat dárbbaša eambbo julggiid man alde čuožžu, deattuha Hofstad Helleland.
Nuorra albmá guovtto mielas lea vuogas go ministtar boahtá sudno fitnodaga geahččat.
– Somá go lea beroštupmi Guovdageainnu ovdáneapmái ja mo moai dáppe áiggošeimme joksat riikkaidgaskasaš dronamárkaniid, mojohallá Somby.