Tjoerin krïevviem Nöörjese juhtedh, menh eah åadtjoeh daesnie årrodh
Ruvhten Sïjte gåatomedajvh Sveerjesne dasseme. Dan åvteste tjoerin sijjen bovtjh Nöörjese juhtedh. Daelie dah naan stoerretjuetie krievvieh Femundmarkesne utnieh, gusnie Femunden sïjte daelvielaantem åtna. Femund sïjten åejvie, Inge Even Danielsen jeahta Ruvhten sïjte idtjin dejgujmie soptsesth åvtelen sijjen bovtjh juhtin.
– Ij maehtieh numhtie darjodh åvtelen kraannajgujmie soptsestamme, Danielsen Arbeidets rettese jeahta.
Dejpeli bovtjealmetjh provhkin sijjen bovtjh Femundmarkesne utnedh, menh jaepien 1972 raastelaake bööti, gusnie tjåådjte bovtjh Sveerjeste eah edtjh Nöörjesne årrodh. Daelie Ruvhten sïjte dåeriesmoerh laanteaajhterigujmie åtneme jïh eah nuekies gåatomedajvh utnieh.
– Dan åvteste ibie latjkoem utnieh, tjoerebe gåatomedajvem Nöörjesne nuhtjedh maam åvtelen 1972 nuhtjimh, Ruvhten sïjten åejvie, Marcus Rensberg jeahta.
Båatsoedirektööre Trööndelagen Staathaaltoejisnie , Siv Merethe Belbo jeahta satne guarkoe Ruvhten sïjte lea geerve tsiehkesne, menh jeahta dah tjuerieh Nöörjen båatsoen reaktah vaarjelidh. Ruvhten Sïjte dïjremem åådtjeme sijjieh tjuerieh sijjen bovtjh bååstede Sveerjese juhtedh. Jïs eah daam darjoeh, dellie Nöörjen byjjesfaamoe tjuerieh bovtjide jïjtjh juhtedh.
– Mijjieh sïjhtebe gaskesadtemem utnedh, juktie bööremes bovtjide sjædta. Daelie lea suehpede, jïh ibie sïjhth krievviem sturredh vielie goh daarpesjibie, menh tjoerebe mijjen njoelkedassh fulkedh, Belbo jeahta.
– Båatsoedirektööre jeehti dah edtjieh haepkiem nuhtjedh, jis ibie mijjen bovtjh jïjtjh juhtebe, menh im vïenhth mijjieh dam darjobe. Mijjieh dajvesne abpe tïjjem orreme, jïh edtjebe jåerhkedh dajvesne årrodh, Rensberg jeahta.
Rensberg jeahta dah eah sïjhth vigkiem Nöörjen båatsojne darjodh. – Lea reerenasse mij lea dåeriesmoere gåabpatjahkine laantine. Ij vielie gåaredh.
Dan åvteste dan gellie almetjh leah vaerine, dah tjuerieh dajvide mah leah aajmene nuhtjedh, Rensberg jeahta, Jïs daarpesjieh, dellie edtjieh reaktaöörnegem nuhtjedh, dïhte jeahta.