Normal

Ii ahkiduša váikko lea okto

Juovllaid leat olusat basuhan okto. Unjárgalaš Johan Andreas Andersen lea okta dáin, muhto son gal ii dan dihte ahkiduša.

Johan Andreas Andersen
Foto: Nils Henrik Måsø / NRK

– Gal don oainnát mo mun ávvudan juovllaid, eai mus leat mat ge juovlačiŋat, muhto buori borramuša mun gal ráhkadan, goastelábbáerttega ja dieid spiinnebiergguid. Juovllaid ii galgga seastit, dalle galgá albma láhkai herskostallat, oaivvilda Johan Andreas Andersen.

Johan Andreas Andersen, guhte lea maid máŋga CD álmmuhan, lea gávdnan skihppára tiimmus mii lea jo 170 jagi boaris.

– Das lea nu buorre, fiinna jietna. Go čalmmiid vel bidjá gitta, de gal nu vuoiŋŋasta go gullá dán jiena. Dat lea dego skibir, lohká son.

Johan Andreas Andersen

Geahča videoa Johan Andreas Andersenis.

Gávdnojit lágideamit oktoolbmuide

Badjel 100.000 olbmo ávvudit juovllaid áibbas okto Norggas, nu boahtá ovdan heahteveahkkeorganisašuvnnaid almmuhusain.

Danne leat ge maŋimuš jagiid máŋggat organisašuvnnat ja priváhta olbmot álggahan oktasaš juovlaávvudemiid. Nu dahke maiddái Muoffira eaktodáhtolaš guovddážis.

Dáppe gávnnat dieđuid eaktodáhtolaš guovddážiid birra.

– Olbmot háliidit leat ovttas juovlaruohta, muitalii beaivválaš jođiheaddji Muoffira eaktodáhtolaš guovddážis, ovdal juovlaruohtaávvudemiid maid lágidedje.

Liiko jođašit

Dábálaččat ii láve Johan Andreas Andersen ruovttus čohkkát okto juovllaid.

– Mun láven vuolgit johtit Hurtigruta fatnasa fáru, muhto dál in šaddan go lean čuohpaduvvon.

Mo lea okto ávvudit juovllaid?

– Mun lean geafi dien láhkai go mánát eai leat. Mu genat nohket dása, ja dat gal lea suddu. Muhto dása lean hárjánan, váikko muhtin háve ohcalan mun ge guoimmi.

Buorit bealit gal gávdnojit maid oktoeallimiin, oaivvilda Andersen.

– Mus ii leat hušša, ja dat gal lea buorre. Jus duođa galggan dadjat de gal veahá duskkástuvan jus olu mánát joret birra, váibban, nu ahte dien dáfus heive bures okto eallit.