Terrordagut Parisas surgehit: Máilbmi ii leat šat nu oadjebas, lohká sámi girječálli

– Parisa gáhtain lea dál hui jaskat ja lea unnan olmmoš olgun, muitala sámi girječálli Jovnna Ánde Vest. Son ássá Frankriika oaivegávpogis gos terroristat ikte fallehadje ja godde lagabui 130 olbmo.

Jovnna Ánde Vest

– Dieđusge lean dál eambbo balus, lohká sámi girječálli Jovnna Ánde Vest, gii orru Parisas.

Foto: Piera Balto

128 olbmo leat duođaštuvvon goddon ja 180 leat hávváduvvan maŋŋel bearjadat eahkeda terrorfallehemiid Parisas. Dasalassin leat buot dat gávcci terrorista maid jápmán, čiežas dain bávkaledje iežaset jámas.

Loga eambbo: - De skjøt oss som fugler

Gulai radios

Sámi girječálli Jovnna Ánde Vest lea orron Parisas jo 33 jagi, ja son muitala ahte gulai báhčalemiid birrra radios ikte eahkes.

– Mun ledjen ruovttus ja gullen radios daid vuosttaš báhčalemiid birra, mun de árvidin mii dál boahtá, ja jáddadin radio ja bidjen baicca musihka nala, lohká Vest.

Frankriika oaivegávpot vásihii ikte eahkes dan vearrámus falleheami nuppi máilmmi soađi rájes, go terroristat fallehedje spábbačiekčanšillju, konseartabáikki ja kafeaid Parisa guovddážis.

Fallehedje konseartabáikki

Terroristat báhčaledje vuos kafeaid vuostá Parisa guovddážis ovdal go fallehedje Bataclan konsearta báikki, gos ledje birrasit 1500 olbmo. Maŋemus dieđuid mielde jápme 87 olbmo dáppe ovdal go Frankriika sihkkarvuođaveahka bođii báikái. Terroristat bávkkaledje de iežaset jámas.

Kvinne blir evakuert fra Bataclan-konsertlokalet.

Nissonolmmoš evakuererjuvvo Bataclan konseartabáikkis, gos terroristat godde 87 olbmo.

Foto: KENZO TRIBOUILLARD / Afp

Báhčealeamit Bataclan konsearta báikkis lei okta oktibuot guđa iešguđegelágan falleheamis Parisas ikte eahkes. Golbma bávkkaleami dáhpahuvve muhtin baras Stade de France spábbačiekčanšillju lahka, gos Frankriika riikajoavkui lei čiekčame Duiska riikajoavkku vuostá. Frankriika presideanta Francois Hollande lei spábbačiekčamis, ja son dolvojuvvui sihkkarvuhtii.

Balus

Ekstremista joavku IS lea dadjan ahte sii dat leat čađahan terrordaguid Parisas.

– Dieđusge lean dál eambbo balus go gulan mot máilbmi nupppástuvvá, ii leat šat nu oadjebas dilli dáppe šat. Dát čuohcá buohkaide, lohká Jovnna Ánde Vest, gii ássá sulli golbma gilomehtera eret báikkis gos fallaheamit dáhpáhuvve Parisa guovddážis.

Son muitala ahte Parisas leat ođđajagimánu terrordaguid rájes leamaš olu politiijat gáhtain, ja son mieđiha maid ieš ahte lea eabbo gozuid alde leamaš go vánddarda gávpogis.

Vaikko terrordagut surgehit, de áigu son aŋkke odne fitnat gávpogis váccašeame nu go láve.

– Ii leat gal šat nu somá, láven dávjá váccašit guovllus gos ikte ledje báhčimat, lohká son.

– Muhto eallit dál ferte, ja mun gal jáhkán mus leat iežan suodjaleaddjit geat čuvvot mu.