Dáid beivviid lea Beaivváš Sámi Teáhter jođus bihtáin "Ridn'oaivi ja nieguid oaidni". Dá lea áidna teáhterbihttá man Áillohaš-rohkki lea čállán, ja das lea musihkka. Neavttár Egil Keskitalo lea mielde dán bihtás, ja son lea bargan teáhteris bistevaš virggis 1999 rájes. Keskitalo gal jáhkká ahte livččii teáhterii buorrin jus olbmot beasaše oastit cd dahje dvd mas lea dat musihkka mii bihtás gullo.
"Min duoddarat" (1981), "Soga boalga" (1986), "Luohti gomuvuođa salas" (1988), "Earálágan" (1992) ja "Ronjá Rievvárnieida" (2002) leat muhtun bihtát main lea musihkka.
"Min duoddarat" lea áidna teáhterbihttá man musihkka lea almmuhuvvon kásehttii. Musihkka mii gullui "Earálágan" ja "Ronjá Rievvárnieida" bihtáin lea ges báddejuvvon nu ahte leat šaddan oassin NRK Sámi Radio musihkkavuorkkás. Nu leat ge olbmot juste dán guovtti bihtá musihkkii oahpásnuvvan radio bokte.