Hopp til innhold

Son badjelgeahčai mu

25-jahkásaš Guovdageainnu bárdni časkkii dán vahkkoloahpa Ruoŧa meaštára Amatevrra Mixed Martial Art doarrungilvvus. Ieš ii lohkan iežas leat balus ovdal gilvvu, muhto gal son ieš vissa balddii iežas gilvaleaddji.

Francis Carmont Costa Philippou

Áiccalmahttingovva

Foto: Chris Young / Ap

Ole Johnny Eriksen, Guovdageainnu almmái, lea beaggán maŋimuš jagiid go lea birgen bures dán veahá issoras valáštallamis Mixed Martial Art (MMA) vaikko vel leage sápmelaš ii ge guhkes dáža.

Mixed Martial Art lea muhtunlágan doarrun- dahje heaibungilvu, mas buot heaibun- ja doarrunvaláštallamat leat seaguhuvvon oktii.

Dán vahkkoloahpa Ruoŧas de časkkiige Eriksen Ruoŧa MMA-heaibunmeaštára Joel Moya, guhte maid lea Ruoŧa riikkajoavkkus. Moya lea seamma ahkásaš go Guovdageainnu nuorra taleanta. Ruoŧa meašttir lea hárjehallan MMA-valáštallamis olu jagiid guhkit go Eriksen, ja danne de son lei várra jáhkkán ahte birge bures Eriksenis dán vahkkoloahpa gilvvuin.

- Son lei várra badjelgeahččan mu

Ole Johnny Eriksen logai gullan Joel Moya lohkamin ovdalaš gilvvu ahte Eriksen ii gal birge sus. Moya lei vissa geahččan boares filmmaid Ole Johnnys go doarui jagi dás ovdal. Ruoŧa meašttir diehttalas ii lean jáhkkán ahte Eriksen lei ovdánan nie issorasat jagis.

– Vuosttas geardde go guoskkehin sutnje go gilvu lei álgán, de gal galljo sus čalmmit, muitala MMA-doarrunvaláštalli Ole Johnny Eriksen.

Dalle de buollái albma gilvu áidojuvvon gilvorieggá siste. Juohke gilvu bistá vihtta minuhta, muhto gal viđa minuhtas geavaha olmmoš ollu fámuid, lohká Eriksen.

Boahtte jahkái de lea sámegánda Ole Johnny Eriksen jurddašan álgit gilvalit MMA-gilvvuin ámmát dásis.

Loga eambo MMA-valáštallama birra dás.

Korte nyheter

  • Dieđihit eambbogo 30 goddon Israelea falleheamis Syriijas

    Siviila olbmot ja soalddáhat galget leat goddon israelalaš áibmofalleheamis Syriijas, syriijalaš eiseválddiid dieđuid mielde.

    Eanetgo 30 olbmo galget dieđuid mielde goddon.

    Dieđuid mielde galgá Israel fallehan Aleppo gávpoga mannan ija diibmu 01.45 báikkálaš áigge.

  • – Alimus Hálddahusriekti bággeha ii-sápmelaččaid Sámediggái 

    Sámiráđi ságadoalli Áslat Holmberg oaivvilda, ahte Suoma Alimus Hálddahusriekti (AHR) badjelgeahččá sámi álbmoga.

    – AHR lea ođasmahttán mearrádusaid, mat leat gávnnahuvvon rihkkut sápmelaččaid vuoigatvuođa friddja politihkalaš ortniiduvvamii, oaivvilda Holmberg.

    AHR lea mearridan, ahte mannan čavčča sámediggeválggaid galgá lágidit ođđasit.

    Riekti lea gieđahallan badjel čuođi sámediggeválggaid válgalogahallama ja válgabohtosa guoski váidaga.

    – AHR fas bágge Sámedikki dohkkehit 72 ii-sápmelačča ižas jienastuslohkui. Ná áitá Sámedikki legitimitehta sápmelaččaid ovddastanorgánan, cuiggoda Holmberg.

    Aslak Holmberg
    Foto: Piera Heaika Muotka / Sámiráđđi
  • Ođđa sámediggeválggaid ferte lágidit maŋimustá geassit

    Sámedikki ságadoalli Pirita Näkkäläjärvi ii sáhte vel dadjat, maid ođđa válggaid lágideapmi johtilis áigetávvaliin mearkkaša, dieđiha Yle Sápmi.

    Alimus hálddahusriekti (AHR) dagai historjjálaš mearrádusa, go mearridii vuosttaš geardde, ahte Suoma sámediggeválggaid galgá lágidit ođđasit.

    Ođđa válggaid galggašii sámediggelága mielde lágidit guovtte olles mánu geažes das, go válggaid gomiheames lea mearriduvvon.

    AHR presideanta Kari Kuusiniemi dulkojumi mielde ođđa válggaid galgá lágidit geassemánu loahpa rádjai.

    Pirita Näkkäläjärvi
    Foto: Ođđasat / Yle Sápmi