NRK Meny
Normal

Suomabeale bartaeaiggát gáibida fierpmástallan-lobi Deanus

Báikki olbmot ja turisttat fertejit garrasit gáržžidit iežaset bivddu go Deanočázádahkii boahtte jagi rájes ásahuvvojit ođđa bivdonjuolggadusat. Dušše suomabeale bartaeaiggádat ožžot ođđa vuoigatvuođaid. Muhto ieža eai duđa dasa.

Veikko Rintamäki, leder av Tenon kiinteistönomistajat r.y

BÁRTAEAIGGÁDIID NJUNNOŠ: Veikko Rintamäki jođiha Deanučázádaga suomabeale bartaeaiggádiid searvvi; Tenon kiinteistönomistajat r.y. Son ovddasta badjelaš 50 bartaeaiggáda.

Foto: Nils Henrik Måsø / NRK

Čáhcevuloškámera bokte oaidná Veikko Rintamäki stuorra luosaid mat vuojadit su bartta meattá.

Juohke giđđageasi go báikkeolbmot golgadišgohtet, de dát eanaeaiggát ferte dušše geahččat.

– Dainna in leat duhtavaš, dadjá son.

– Manne?

– Na go juo mus ii leat lohpi golgadit.

Veikko Rintamäki, leder av Tenon kiinteistönomistajat r.y

ČUOVVO MIELDE: Čáhcevuloškámerain šaddá measta dego luossa «gallestaddá» Rintamäki beaivelánja duolletálle.

Foto: Nils Henrik Måsø / NRK

– Leat han lobálaš bivdovuogit

Beaivválaččat Veikko Rintamäki ássá Seinäjokis. Dat lea sullii 1000 kilomehter eret Ohcejogas.

Viđa jagi áigi ostii eatnama Deatnogáttis, Ohcejogas, ja huksii bartta deikke.

Son jođiha Deanučázádaga suomabeale bartaeaiggádiid searvvi, mas sullii 50 miellahttu.

Dál son ja eará bartaeaiggádat gáibidit beassat fierpmástallat seamma láhkai go guovllu ássit sáhttet.

– Dan mii dáhttut dan geažil go stággo- ja fierbmebivdu leat lobálaš bivdovuogit Suomas, dadjá Rintamäki.

Fiskehytter på finske side av Tanaelva

BARTTAT DIEVVA: Suomabeale Deatnogáttis leat ollu eambbo barttat go Norgga bealde. Ollu dáid barttaid eaiggádat eai leat báikkálaččat.

Foto: Eilif Aslaksen / NRK

Šaddet ođđa njuolggadusat

Deanočázádahkii lea árvaluvvon ođđa guolástansoahpamuš. Sihke báikki olbmot ja turisttat fertejit gáržžidit bivddu, go oaivvilduvvo ahte čázádaga luossanálit leat áitojuvvon.

Muhto Suoma bartaeanaeaiggádat eai šat rehkenastojuvvo leat turistan nu mo dássážii. Danin ožžot seamma bivdovuoigatvuođaid go báikki stággobivdiin leat.

Áidna erohus lea ahte fertejit loahpahit suhkama logi beaivve ovdal go báikeolbmot. Muđuid besset oaggut justa seammá eavttuid mielde go báikkálaš olbmot.

Dasa bartaeaiggádat eai duđa.

Go sii leat eanaeaiggádat, de ferte maid fierbmelohpi čuovvut mielde, sii oaivvildit.

– Suoma lága vuođul mii leat ovttadássásažžan, dadjá Veikko Rintamäki.

Dát hárdá guovllu ássi Aslak Pieski, guhte ássá dušše moadde kilomehtera badjelis su Rintamäli bartta.

Aslak Pieski, Utsjok

EDDON: Báikkálaš ássi ja guolásteaddji, Ohcejohkalaš Aslak Pieski.

Foto: Nils Henrik Måsø / NRK

«Luossa-lordat»

– Muhto go dál go duot bohte ja oamastit eatnama, de daidda gal stáhta áiggošii silbatallearkka alde addit vuoigatvuođaid; ahte «dii lehpet nu go báikki olbmot dál», cealká Aslak Pieski

Son govvádallá ođđa kránnjáid ná:

– Diet han bohtet dat ođđa oligárkat – dakkár «luossa-lordat», dadjá Pieski.

Veikko Rintamäki mielas lea fierpbmástallangáibádus dehálaš.

– Lea dušše okta tiŋga mas mu mielas lea ná stuorra árvu, ja dat leat guolástanvuoigatvuođat, dadjá loahpalaččat.