NRK Meny
Normal

Suoma Sámediggi guoddala Deanosoahpamuša

– Mun doaivvun ahte guoddaleapmi ii joavdda menddo maŋŋit Riektekansleriijai ja Riikkabeivviide, lohká sámediggeáirras Pentti Pieski.

Pentii Pieski čájeha deanoluosa

GÁRŽŽIDUVVO: Luossabivdogáržžideamit čađahuvvojit almmá lágalaš gulaskuddama hága guovllu bivdiiguin ja Sámedikkiin, oaivvilda sámediggeáirras Pentii Pieski.

Foto: Priváhta

Guoddaleamis čuoččuhuvvo ahte Suoma Eana- ja meahccedoalloministeriija lea rihkkon sámediggelága ovccát paragráfa dan dihtii go Sámediggi ii leat beassan váikkuhit Deanosoahpamuša sisdoalu.

– Eanan- ja meahcceministeriija gulahalle Sámedikkiin easkka maŋŋá go Suopma ja Norga ledje čállán vuollái šiehtadusa. Dat ii soabat sámediggelágain, čilge sámediggeáirras Pentti Pieski.

Son dat lea ovttas Tuomas Aslak Juusoin juo beannot mánu áigi ávžžuhan Sámedikki stivrra guoddalit Riektekansleriijai (geahča dahkogavvadusa olgeš ravddas) dan Deanočázádaga ođđa soahpamuša maid Norgga ja Suoma ráđđehusat leat vuolláičállán.

Muhto easkka ikte sáddejuvvui guoddaleapmi.

– Buoret maŋŋit go ii goassige, vástida Pentti Pieski.

Doaivu ášši bissehuvvot

Suoma Riikkabeaivvit leat juo gieđahallagoahtán Deanosoahpamuša. Muhto Pieski doaivu guoddaleami sáhttit bissehit ášši.

Son goit rámiida dan guoddalusčállosa maid Sámedikki stivrra lea sádden, go das su mielas hui bures čilgejuvvo makkár lágaid Eana- ja meahccedoalloministeriija lea rihkkon meannudeami oktavuođas.

Tiina Sanila-Aikio i møtesal i Utsjok

VÁIKKUHUSAT: Guoddaleapmi váikkuha doaivumis maid boahttevuođa meannudeamiid nu ahte sápmelaččat eai šat olggoštuvvo iešguđet áššiid hárrái, samediggepresideanta Tiina Sanila-Aikio doaivu.

Foto: Nils Henrik Måsø / NRK

Sámediggepresideanta Tiina Sanila-Aikio šálloša go sis eai leat leamaš doarvái ruđalaš ja olmmošlaš návccat gárvvistit guoddaleami ovdal.

Muhto go guoddaleapmi dál lea sáddejuvvon, de son ge doaivu Riektekansleriija ja Riikkabeivviid áirasiid fuomášit daid stuorra váilevašvuođaid mat leat soahpamuša meannudanproseassas.

– Dán muttus sis lea ain vejolašvuohta bissehit proseassa, Sanila-Aikio vástida.

– Rihkku maid olmmošvuoigatvuođaid

Su mielas Suoma stáhta ii leat healban dušše stáhta njuolggadusaid, muhto maiddái riikkaidgaskasaš šiehtadusaid.

– Deatnogátti ássiid kultuvrra gártá nu sakka loavkiduvvot bivdogáržžidemiid geažil, ahte dat maid rihkku riikkaidgaskasaš olmmošvuoigatvuođašiehtadusaid. Álgoálbmogiin galgá dan vuođul leat riekti seailluhit ja ovddidit iežaset kultuvrra, son čilge.

Riektekansleriijas eai sáhte vuos vástidit mo ja goas guoddaleapmi meannuduvvo.