Skearru mii galggašii movttidahttit buot sámi mánáid

Márkomeannu-festivála dat álggahii musihkkaprošeavtta, ja válljii dan vihttasa geat lávlot skearrus. Sii leat Ronja Larsen, ÅVLA, Yungmiqu, Emma Elliane ja Saara Hermansson.

NRK Urbi doaimmahusa jienasteamis šattai skearru «Mánáidmeannu» suoidnemánu Urbin.

Stuora gudni ja hui somá

Son guhte lea jođihan buvttadeami lea Jakop Janssønn. Su mielas lea gudni ahte juste dát skearru nammaduvvo suoidnemánu Urbin. Øystein Myrvoll ja Viktor Bomstad leaba maiddái bargan buvttadeaddjin dán skearrus, iešguđet lávlagis.

– Lea leamaš hástaleaddji bargu, go Covid-19 hehttii guokte artista boahtimis Ruoŧas ja Suomas min studioi, mii lea Norggas, muitala Janssønn. Dat golbma artistta geat orrot Norggas gal besse oaidnalit go ledje oktanaga studios, muitala buvttadeaddji.

Lihká leat sii teknologiija bokte gávdnan čovdosiid, sihke gulahallamii, plánemii ja báddemiidda.

– Gal mii leat riŋgen buot mainna fal lea vejolaš, boagusta Jakop Janssønn. Facetime, Zoom ja eará teknologiija lea gádjon buvttadeami.

Dat vihtta artista leat ieža čállán sániid ja ráhkadan šuoŋaid. Dása lea sis leamaš bagadalli guhte diehtá movt ferte jurddašit go čállá mánáid váste.

Dárbu dákkár skearruide

Saara Hermansson ássá Johkamohkis, ja doppe son bargá lullisámegieloahpaheaddjin. Son ii beassan Ruoŧas Norgii pandemiija geažil, muhto son lea bures hárjánan gáiddusoahpahussii, mii sulastahttá dan maid dál fertejedje bargat.

– Munnje lea oahpis dat teknologiija-máilbmi, dadjá Saara. Muhto son mieđiha ahte lei veahá váivi go ii beassan eará artisttaiguin deaivvadit studios.

Saara Hermanssona guokte lávlaga dán skearrus leat «Lahkoe biejjine» ja «Dåeredh manneb».

– Nubbi lea riegádanbeaivvi birra, ahte mánáide lea dá okta dain buoremus beivviin, čilge Saara. Nubbi lea ges guovtti máná ođđa ustitvuođa birra, go vuolgiba fárrolaga máilbmái.

Oahpai ođđa bargovuogi

Emma Elliane Oskal Valkeapää (21) lea dat artista guhte skearrus lávlu davvisámegillii. Son muitala ahte lea nu giitevaš go beasai dán prošektii, go diehtá man unnán sámi mánáidmusihkka dat gávdno.

– Mun in leat goasse ovdal čállán mánáide, ja mun ohppen bagadallis Tonje Unstadas nu ollu, muitala Emma Elliane.

Dál lea oahppan ahte lea dehálaš válljet dakkár fáttáid maid mánát ipmirdit, ja dovdet ahte dát guoská sidjiide.

Emma Elliane sávvá ahte su lávlagat «Boađe mielde» ja «Oahppat» buktet dánsun- ja lihkadanmiela. Ieš lea hui duhtavaš dainna ahte dán skearrus lea ođđaáigásaš jietnagovva, nu go elektrovnnalaš jienat ja raplávlagat.

Dehálaš go lea máŋgga sámegillii

Sihke buvttadeaddji ja artisttat oaivvildit ahte dá lea dehálaš skearru, juste fal danne go lea julev-, lulli- ja davvisámegillii. Sii buohkat sávvet ahte buot sámi mánáidgárddit sáhttet čuojahit skearru.

Jakop lea čuojahan skearru iežas lagas bearraša mánáide, ja dadjá ahte mánát orrot liikome musihkkii.

– Dás eai leat diekkár «Lille Petter edderkopp» lávlagat, ja dat čájeha ahte lea dehálaš fállat mánáide pop ja rap-lávlagiid, oaivvilda Janssønn.

Dien doarjuba Saara ja Emma Elliane.

– Márkomeanus bohte sihke mánát ja sin váhnemat min lusa maŋŋel konseartta ja rámidedje min lávlagiid, muitala Emma Elliane.

Saara ges jurddaša ahte eará festiválat nai sáhtáše álggahit dákkár prošeavttaid, go de han leavašii sin nama bokte eanet sámi mánáidmusihkka.

Eará artisttat geat eai olahan bajimužžii

Dá leat dat artisttat geat almmuhedje musihka suoidnemánus, ja ledje mielde NRK Urbbi árvvoštallamis; Kevin Boine, Rolffa, Marja Mortensson ja KORK, Tøndra, DJ Ailo ja Inna Marja Amundsen, Erik, Slincraze, Nils Jøran Eira ja Eira, Emil ja Lávre, DJ Idja, Niilas, Piera Eira ja Bernt Mikkel Haglund, Åge Aleksandersen ja Violet Road, Piqsiq ja Vildá, Komet Rain ja Cazoo.

Guldal sin šuoŋaid dás: