Suohkanministtar soaitá mearridit

Romssa ja Finnmárkku fylkkaid ovttastuhttinbargu ii oro ovdáneamen. Danne lea suohkan- ja ođasmahttinministtar Monica Mæland bovden dán guovtti fylkasuohkana njunnošiid čoahkkimii boahtte vahkus. Vearrámus mii dán áššis sáhttá šaddat lea ahte dát guokte fylkka ovttastuhttojit čoavddekeahttá olu dehálaš áššiid, nugo gosa guovddášbáikki ásahit. Dán duođašta suohkan- ja ođasmahttindepartemeantta ossodatdirektevrea Mari Jacobsen šleađgapoasttas NRK:i.

Finnmárkku fylkasátnejođiheaddji Ragnhild Vassvik lea sihkkar ahte gávdno čoavddus dán áššis.