NRK Meny
Normal

Suohkana meattáhus sáhttá goazahan doavttirjournála sirdima

Jus leaš nu ahte Ellen Maaret Kristiina Labba lea šaddan vuordit váile beannot jagi oažžut doavttirjournála, de dasa sáhttet leat máŋga siva. Dan dadjá Guovdageainnu suohkana doaibmi ráđđeolmmái, Karin Hætta.

Konstituert rådmann i Kautokeino Karin Hætta foran et Áillohaš-maleri

Guovdageainnu suohkana doaibmi ráđđeolmmái mieđiha suohkana meaddán, ja lohpida journála sáddejuvvot moatti beaivvi sisa jus ođđasit oažžu dieđu pasieanttas.

Foto: Åse Pulk/NRK

Hætta maiddái mieđiha ahte suohkan ii sáhte gáibidit ahte pasieanta ferte dábálaš reivve bakte gáibidit iežas doavttirjournála sáddet nuppi suohkanii.

Guovdageainnu suohkana dearvvašvuođasuorggi ossodatjođiheaddji, Sara Eira Gaup dat ikte dajai NRK Sápmái ahte Labba ferte juogo ieš buktit reivve dearvvašvuođasuorgái dahje dan sáddet reiven boastta mielde.

Geahčadit rutiinnaid

Karin Hætta dadjá ahte suohkana bealis fertejit sii geahčadit makkár rutiinnat leat suohkana ossodagain. Dát guoská earret eará dasa movt elektrovnnalaš boastta, mii lea sáddejuvvon njuolga dihto bargái, merkejuvvo suohkana boastajournálii vai sii sáhttet gozihit ahte reive joavdá rievddes áššemeannudeaddjái.

Hætta dadjá ahte buot poasta Guovdageainnu suohkanii galgá sáddejuvvot suohkana váldo šleađgaboasta čujuhussii, e-post@kautokeino.kommune.no, iige juohke bargi šleađgaboastačujuhussii.

Karin Hætta mieđiha ahte sáhttá dagahit váttisvuođaid jus boasta sáddejuvvo bargi šleađgaboastačujuhussii, danin go dat sáhttá dagahit ahte boasta ii čállojuvvo suohkana boastalistui, iige sáddejuvvo rievttes áššemeannudeaddjái, dadjá Karin Hætta. Son seammás lasiha ahte ii sáhte vástidit ahte nu leat geavvan dán áššis.

Oažžu journála

Jus Ellen Maaret Kristiina Labba ođđasit sádde šleađgaboasta, man son sáddii Guovdageainnu suohkanii 2015 cuoŋománus, de son gal doaivu Labba doavttirjournála sáddejuvvo su ođđa fásta doaktárii 3-4 beaivvi sisa, loahpaha Guovdageainnu Suohkana doaibmi ráđđeolmmái, Karin Hætta.