Boazoeaiggát Ánde Somby Jr. ii leat vuos hárjánan virjjiguin loktet lahka tonna fuođđara rehkii.
– Mii šaddat oastit issorasat ja dat lea olggosgollu oastit dáid. Dás lea máŋga čuohteduháha ovddas fôrat, dadjá son.
Ánde čilge ahte sin eallu lea Vullošjogas, čieža miilla dobbelis Kárášjoga čoahkkebáikki.
Suodjalus veahkeha fuođđariiguin
Eanandoalloministtar Olaug Bollestad (Risttalaš Álbmotbellodat) lohpidii suodjalusas veahki fievrridit fuođđariid ealuide, go duorastaga čoahkkinasttii Norgga Boazosápmelaččaid riikasearvvi (NBR) jođiheddjiin Ellinor Marita Jåmain.
Jåma lea duhtavaš go ožžot veahki.
– Mii diehtit ahte máŋggas leat váiban, go leat guhká ja garrasit bargan birra jándora, dadjá NBR:a jođiheaddji.
Eanandoalo- ja biebmodepartemeanttain (EBD) lea leamaš oktavuođas politihkalaš hoavdajoavkkuin suodjalusdepartemeanttas. Doppe dieđihit ahte sii sáhtte veahkit jus eará siviila resurssat eai leat doallevaččat.
EBD lea maid leamaš oktavuođas Romssa ja Finnmárkku fylkkamanniin, mii čielggada dán ášši maid Servodatsihkarvuođa ja gearggusvuođa direktoráhtain.
Earenoamáš dilli
Eanandoalloministtar diehtá movt roassu čuohcá boazoeaiggádiidda, geat dál leat váttis ekonomalaš dilis.
– Boazoealáhus lea hui duođalaš ja gáibideaddji dilis, dadjá ministtar preassadieđáhusa bokte mediaide.
Vaikko roassu čuohcá garrasit boazoeaiggádiid millii ja eadduda sin, de jáhkká ministtar boazoealáhusa seailut.
– Mii galgat ovttas nagodit gieđahallat roasu nu bures go vejolaš, dadjá ministtar.
Juohkigohtet 10 miljovnna
Romssa ja Finnmárkku fylkkamanni boazodoalloossodat lea meannudeame 60-70 ohcama ja leat gearggus juolludišgoahtit 10 miljovnna ovddas doarjagiid.
Boazodoallodirektevra Sunna Marie Pentha deattuha ahte sii leat ožžon máŋga ohcama boazoeaiggádiin, muhto sii eai dohkket eará orohaga ohcamiid.
Direktevra einnosta foandda miljovnnaid juolludit viđa beaivvis.
– Nugo mii leat rehkenastán, de mii árvidit ahte njukčamánu mielde mii leat juolludan oalle muddui visot, dadjá boazodoallodirektevra.
Direktevra čilge maid ahte juohke orohat sáhttá oažžut gitta guokte ruvnno doarjaga juohke bohcco nammii jándoris.
– Mii oaidnit ahte roassu lea hui lossat boazoealáhussii. Muhtun orohagain lea roassu bistán measta guokte mánu, dadjá boazodoallodirektevra.
Son lea gulaskuddan maid eará veahki fievrridit fuođđariid ealuide.
– Mis leat maid gulahallan Rukses Ruossain ja jearran leago sis maid vejolašvuohta veahkehit.
Árvvoštallet lassi doarjaga dađistaga
Eiseválddit árvvoštallet heahtegearggusvuođafoandda 10 miljovnna ruvnno bistit njukčamánu loahpageahčái.
Sii ávžžuhit orohagaid ohcat lassi doarjaga dárbbu mielde.
«Jus orohagat háliidit sihkkarastit doarjjaruđa ovdal beassážiid, de fertejit ohcat ovdal njukčamánu 30. beaivvi».
Nu čállá departemeantta preassadieđáhusas.
Sii dieđihit seammás ahte ohcamat meannuduvvojit dađi mielde cuoŋománus, jus orohat ii oza ovdal áigemeari.
Eiseválddit čuovvu roasu ovdáneami ja árvvoštallá ovttasráđiid NBR:ain makkár dárbu ealáhusas lea dađistaga, ja leago dárbu liige doarjjaruhtii.
EBD deattuha roassu váikkuha 160 000 bohccui Norggas, ja beare olu boazu ii leat sivvan heahtedillái.