Gulaskuddančoahkkimii lei Stuorradikki energiija- ja biraslávdegoddi bovden earret eará Sámedikki, Deanu gieldda, bivdovuoigatvuođaguddiid ja muđui berošteddjiid ja organisašuvnnaid.
Maŋidii meannudeami
Suoma Riikabeaivvi vuođđolágalávdegoddi galggai meannudit Deanusoahpamuša, muhto maŋidii gieđahallama, ja nu dagai maiddái Norgga Stuorradikki dárkkistan- ja konstitušuvdnalávdegoddi ikte.
Sámediggeráđđi čuovvu čoahkkima
Sámediggeráđđi Inger Eline Eriksenis lei čielga ráva Stuorradiggái, ahte sii váldet ovddasvástádusa ja máhcahit ášši fas ráđđehussii dainna čielga dieđuin ahte báikkálaš hálddašeapmi galgá sihkkarastojuvvot ovdalgo sáhttit joatkit šiehtadallamiiguin.
- Loga dárogilli: Lokal forvaltning av fiske i Tanavassdraget
Inger Eline Eriksen čálii ahte bivdosoahpamuš dálá hámis mearkkaša historjjálaš vearrivuođa sámiid vuostá, ja ahte lea dušše Stuorradiggi mii dan sáhttá bissehit.
Vuoigatvuođaášši
Báikkálaš hálddašeaddjit čuoččuhedje ahte ráđđehus ođđa bivdosoahpamušain lea mieđihan Suoma bartaeaiggádiidda nuvttá bivdovuoigatvuođaid Norgga beale rájá.
Soahpamušvuostálastit oaivvildedje ahte báikegotti olbmot manahit vuoigatvuođaideaset, ja ahte lulli láttániidda ja bartaeaiggádiidda fas láhččojuvvojit seamma bivdovuoigatvuođaid go mat báikkiolbmuin odne leat.
Oanehis ságastallanáigi
Stuorradikki energiija- ja biraslávdegotti rabas gulaskuddančoahkkimis odne lei juohke jovkui, geat leat dieđihan gulaskuddančoahkkimii, láhččojuvvon 10 minuhta áigi ovdanbuktit iežaset ákkaid áššái.