NRK Meny
Normal

Stuorradiggi meannudii Deanusoahpamuša odne

Maŋŋel go Deanusoahpamuša ráđđádallamat ja soahpamuševttohus garrasit leat cuiggoduvvon, de lei Norgga Stuorradikki energiija- ja biraslávdegoddi bovden rabas gulahallamii Oslos odne.

Forslag i Stortinget om utsettelse av slukking av FM-nettet.

Stuorradikki energiija- ja biraslávdegotti jođiheaddji lea Gurutbellodaga, Ola Elvestuen. Odne besse gullat eanet Deanusoahpamušas ovdalgo mearridit dohkkehit dahje hilgut go soahpamuša.

Foto: Håkon Mosvold Larsen / NTB scanpix

Gulaskuddančoahkkimii lei Stuorradikki energiija- ja biraslávdegoddi bovden earret eará Sámedikki, Deanu gieldda, bivdovuoigatvuođaguddiid ja muđui berošteddjiid ja organisašuvnnaid.

Maŋidii meannudeami

Suoma Riikabeaivvi vuođđolágalávdegoddi galggai meannudit Deanusoahpamuša, muhto maŋidii gieđahallama, ja nu dagai maiddái Norgga Stuorradikki dárkkistan- ja konstitušuvdnalávdegoddi ikte.

Sámediggeráđđi čuovvu čoahkkima

Sámediggeráđđi Inger Eline Eriksenis lei čielga ráva Stuorradiggái, ahte sii váldet ovddasvástádusa ja máhcahit ášši fas ráđđehussii dainna čielga dieđuin ahte báikkálaš hálddašeapmi galgá sihkkarastojuvvot ovdalgo sáhttit joatkit šiehtadallamiiguin.

Inger Eline Eriksen i TV-studio

Sámedikki ráđđelahttu, Inger Eline Eriksen ovddasta Sámediggeráđi rabas gulaskuddančoahkkimis man Stuorradikki energiija- ja biraslávdegoddi lágida Stuorradikkis odne.

Foto: Marit Sofie Holmestrand / NRK

Inger Eline Eriksen čálii ahte bivdosoahpamuš dálá hámis mearkkaša historjjálaš vearrivuođa sámiid vuostá, ja ahte lea dušše Stuorradiggi mii dan sáhttá bissehit.

Vuoigatvuođaášši

Báikkálaš hálddašeaddjit čuoččuhedje ahte ráđđehus ođđa bivdosoahpamušain lea mieđihan Suoma bartaeaiggádiidda nuvttá bivdovuoigatvuođaid Norgga beale rájá.

Soahpamušvuostálastit oaivvildedje ahte báikegotti olbmot manahit vuoigatvuođaideaset, ja ahte lulli láttániidda ja bartaeaiggádiidda fas láhččojuvvojit seamma bivdovuoigatvuođaid go mat báikkiolbmuin odne leat.

Oanehis ságastallanáigi

Stuorradikki energiija- ja biraslávdegotti rabas gulaskuddančoahkkimis odne lei juohke jovkui, geat leat dieđihan gulaskuddančoahkkimii, láhččojuvvon 10 minuhta áigi ovdanbuktit iežaset ákkaid áššái.