Stockholmma universitehta stáhtadiehtti Ulf Mörkenstam, dutki Eva Josefsen ja Jo Saglie leat ovttas guorahallan mo Norgga ja Ruoŧa sámedikkit doibmet.
Sii almmuhedje árabuš dán jagi ártihkkala dieđálaš bláđis Ethnopolitics, mas geahčadit erohusaid dán guovtti sámedikki gaskkas.
Dás boahtá ovdan, ahte guktuin leat sihke politihkalaš ja hálddašeaddji doaimmat, áirasat válljejuvvojit bellodatvuogádaga bokte ja dat leat masá seammá boarrás.
Dat mii earuha dán guokte párlameantta eanemus leat Sámedikki vejolašvuođat iešmearrideapmái.
Norgga ja Ruoŧa stáhta leat guktot geavahan sámedikkiid reaidun joksat sámi iešmearrideami, muhto leat addán guovttelágán árvvu, fápmodusa ja doaimmaid.
Norgga Sámediggi beassá ieš mearridit mainna bargá. Das lea maid sierra sajádat konstitušuvnnas ja iige gula formálalaččat ráđđehusa vuollái.
Ruoŧa Sámediggi lea bealistis eiseváldi ja danne gullá njuolgga ráđđehusa vuollái.
